Cape Town - Umdlali weManchester City, uYaya Toure, uthi uzimisele ngokuhlala kuleli qembu elingompetha be-Premier League eNgilandi, kubike iKickOff.com ngoLwesibili
Lo mdlali weCity bekunamahlebezi athi ufuna ukulishiya leli qembu lase-Etihad ngemuva kwemibiko eyayithi kunokungezwani kahle phakathi kwakhe nabaphathi, kodwa lo mdlali usedalule ukuthi akayindawo.
“Angikaze ngithi ngifuna ukuhamba,” kusho uToure.
“Ngazithulela nje kukhulunywa, ngicabanga ukuthi ngenza okufanele ngokuthula ngoba ekugcineni isinqumo sizothathwa yimina.
“Ngisazohlala nje kwi-Man City kuze kushaye isikhathi esifanele sokuba ngihambe.”
Ngaphambi kweyeNdebe yoMhlaba, kwavela imibiko ethi uYaya akeneme ngendlela aphethwe ngayo kuleli qembu ngemuva kokuba engafiselwanga usuku lwakhe lokuzalwa ngendlela ayefisa ngayo.
Ompetha iMan City bazodlala umdlalo wabo wokuqala weligi neNewcastle ngeSonto mhlaka-17 Agasti.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.