Johannesburg – Umqeqeshi weBafana Bafana uShakes Mashaba useveze ukuthi akekho ozovala isikhala sesiqongqwane sasemuva seBidvest Wits uBuhle Mkhwanazi.
Ngokubika kwe-SoccerLaduma uMashaba ukubeke kwacaca ukuthi akekho umdlali asazomubiza ukuzovala isikhala salo mdlali.
IBafana Bafana kulindeleke ukuba ibhekane neSudan neNigeria emdlalweni yokuhlunga ye-2015 AFCON.
Umbiko uveza ukuthi uMkhwanazi uphinde wahlolwa yithimba lodokotela beSafa abakuqinisekisile ukuthi nebala ulimele.
UMkhwanazi walimala ngesikhathi ezakhe zidlala umlenze wesibili we-MTN ne-Orlando Pirates.
“Odokotela bethu sebemhlolile uBuhle basitshela ukuthi usalimele.
"Ngeshwa okwamanje ngeke sisakwazi ukwenza izingunquko kuzomele sisebenze ngabadlali esesibaqokile ukuya eSudan,” kusho uMashaba enanela ngokuthi isikhathi sesibadlulile ukuthi basengaletha omunye umdlali kwazise konke okuphathelene nokuhamba kwabadlali sekulungisiwe.
“Bakhona abadlali esengibabonile uma sesibuya eSudan sesibheke umdlalo wethu neNigeria engingase ngibheke kubona,” kusho uMashaba.
- “Like” ikhasi lethu kuFacebook ukuze uthole izindaba ngolimi lwakho