OweBidvest Wits uphawula ngesiqongqwane seqembu

Johannesburg - Umqeqeshi weBidvest Wits uGavin Hunt uthe unesiqiniseko sokuthi isiqongqwane sakhe uSiyabonga Nhlapo ubekulungele ukudlala umdlalo owandulela amanqamu we-MTN 8 ne-Ajax Cape Town.

Kulo mdlalo i-Wits ihlulwe ngegoli elilodwa eqandeni kanti uNhlapo uye kulo mdlalo ngemuva kwezinsuku ezintathu ebanjwe inkunzi wakhonjwa ngesibhamu waphucwa imali engango-R50 000.

Kulo mdlalo uNhlapo ukhishwe ngekhadi elibomvu ngemuva kokudlalisa kabi uToriq Losper kwadaleka iphenathi ngesiwombe sokuqala.

OLUNYE UDABA: UNhlapho uzongena esikhaleni sikaNgcongca

Le phenathi iyona enqobise i-Ajax njengoba ishaywe yinkakha yomdlali uNathan Paulse. I-Ajax izobhekana neKaizer Chiefs emdlalweni wamanqamu walo mncintiswano.

UHunt uyakugcizelela ukuthi lo mdlali weBafana Bafana wayesesimweni esikahle sokudlala lo mdlalo. "Okwami njengomqeqeshi ukuthemba abadlali bami.

Saxoxisana naye wakuveza ukuthi ukulungele ukudlala. Kumele sibethembe abadlali bethu,"kusho lo mqeqeshi. "Ngiyavuma ukuthi ikhadi elibomvu lashintsha okuningi kulo mdlalo," esho ngokubika kweKickOff. 

 - “Like” ikhasi lethu kuFacebook ukuze uthole izindaba ngolimi lwakho                                

 - Landela IzindabaNews24 kuTwitter