Johannesburg – Umqeqeshi weSuperSport United uGordon Igesund ugxeke isinqumo sikanompempe sokungalinikezi iqembu lakhe iphenathi ngesikhathi lidlala neMoroka Swallows ngoMgqibelo kusihlwa.
AMatsatsantsa akwazile ukushaya igoli lokulinganisa kwamosheka izinhlelo zeZinyoni zokubuya namaphuzu aphelele kulo mdlalo. .
Kulo mdlalo ezika-Igesund zibhakuzise inethi ngomzuzu owengeziwe ngegoli lekhanda likaClyaton Daniels.
U-Igesund ukhale ngesinqumo sikanompempe sokungalinikezi iqembu lakhe iphenathi ngomzuzu ka-88 ngesikhathi uThuso Phala edlaliswa kabi ebhokisini leSwallows.
Lo mqeqeshi uthe ushaqekile ukuthi unompempe akabonanga umdlali wakhe edlaliswa kabi ebhokisini.
“Udlaliswe kabi umdlali wami bekufanele kube yiphenathi.
OLUNYE UDABA: AwePSL agaqele ongahanjelwa kahle izinto phesheya
Wonke umuntu onamehlo ukubonile lokhu,” kusho lo mqeqeshi ngokubika kweKickOff.
“Ngikhulume noCraig Rosslee naye uthe ubonile lapho ebehleli khona…
Angikuqondi ukuthi kungani unompempe engabonanga ekubeni ebeseduze kwalapho kwenzeke khona nomsizi wakhe akabonanga futhi,” esho ngokudumala.
Nakuba ebedumele ngesinqumo sikanompempe u-Igesund uncome ukudlala kahle kweSwallows njengoba ilwela ukuzinza kwi-PSL.
“Kumele ngincome ukulwa kweSwallows ngiyazi akulula kula maqembu alwela ukuvika izembe. Bebedlala ngokuzimisela futhi beqinile kakhulu kunathi.”
Lo mdlalo uphele la maqembu ebambe ngegoli elilodwa macala onke.
- “Like” ikhasi lethu kuFacebook ukuze uthole izindaba ngolimi lwakho