Ngokubika kweSoccerLaduma u-VV ukhale ngokuthi bekuwusuku okungabahambelanga kahle enkundleni kulo mdlalo ophele ngo 1-1 ngoLwesithathu.
Kulo mdlalo amaBhakabhaka awadlalanga ibhola elisezingeni njengoba bavumele aMaZulu ukuba alibhakuzise kuqala inethi.
Lo mqeqeshi uthe usola ukuthi abadlali bakhe bebesakhathele ngemuva komdlalo wabo neBidvest Wits obengeSonto weMTN 8.
“Isiwombe sokuqala asidlalanga neze kahle, izinto ziqale ukuba ngcono ngesesibili lapho siqale nokuthola amathuba okukhahlelela ipali,” kusho u-VV.
“Ngesiwombe sokuqala besidlalela emuva sibavumela beza kithina.
Angazi lokhu bekudalwa yini, mahlawumbe abadlali bajabule ngokweqile ngemuva komdlalo weWits.
Kube yinhlanhla ukuthi asiwalahlanga amaphuzu,” kubeka lo mqeqeshi enanela ngokuthi manje sekumele babheke umdlalo wabo wesibili neWits kwiMTN 8.
“Ukuhamba phambili ngamagoli amabili kuyingozi kakhulu, kumele siqaphele kungasikhukhumezi amahlombe,“ kusho u-VV.
- “Like” ikhasi lethu kuFacebook ukuze uthole izindaba ngolimi lwakho