Johannesburg - Kungenzeka sigcine sifezekeile isifiso somgadli weChippa United u-Edward Manqele sokujoyina oshampeni beligi iKaizer Chiefs ngokusho kombiko.
Kukaningi kuvela imibiko yokuthi uManqele angase ajoyine iChiefs kodwa kungenzeki kule minyaka eyedlule kusukela ngezinsuku zakhe esabhakuzisa inethi kwiFree State Stars esangane kwelikanobhutshuzwayo.
IMamelodi Sundowns iyona eyahlula iChiefs ngokusayina lo mdlali ngesizini ka-2012/13 kodwa izinto zangamhambela kahle njengoba agcina esebolekiswa kwiMoroka Swallows.
Esebuyela kwiDowns izinto azibange zisamlungela njengoba egcine esesayina neChippa United.
Imithombo engaphakathi kwiChiefs itshele iSiya Crew ukuthi uManqele ungumgadlo obhekwe ngabomvu yileli qembu kanti kulindeleke ukuthi siphothulwe maduze kuvumelwane maduze neChippa.
OLUNYE UDABA: Angase abuyele kuChippa oweChiefs - Umbiko
Iwindi lokushintshana kwabadlali kulindeleke ukuthi livalwe ngoMsombuluko mhlaka 31 ku-Agasti 2016.
UManqele oneminyaka engu-28 ubudala useke wadlala ngaphansi kukaKomphela beseKwiStars.
Kubikwa ukuthi uKomphela ukulangazelele ukusayina lo mgadli bavuse izinsuku zakudala uManqele engalibheki ipali.
"IKaizer Chiefs neChippa United basezingxoxweni ngodaba lukaManqele. IChippa inentshisekelo ngoDavid Zulu.
Kungenzeka abuyele kwiChippa uZulu bese uManqele ajoyine iChiefs kube yisivumelwane sokushintshisana ngabadlali," kusho umthombo.
- “Like” ikhasi lethu kuFacebook ukuze uthole izindaba ngolimi lwakho
- Landela IzindabaNews24 kuTwitter