Ukhonjwa kwelaseBelgium ogijima kuMaZulu

Johannesburg – Ukhonjwa eBelgium umgadli weBafana Bafana naMaZulu uBongani Ndulula obegaqelwe yiKaizer Chiefs.

Amakhosi yiwona abehamba phambili ekufuneni lo mgadli obeyingxenye yemidlalo yokuhlunga ye-2015 Africa Cup of Nations neBafana Bafana.

Umphathi wezindaba zikaNdulula uTim Sukazi uthe maningi amathuba okuthi lo mgadli alibangise phesheya kwezilwandle ngenxa yamaqembu amfunayo.

“AmaZulu asexhumanile nathi mayelana nokunikeza uNdulula inkontileka entsha.

"Kodwa ngenxa yokuthi uyinyama emaqenjini aphesheya siwachazelile futhi nawo akuqonda lokho,” kusho uSukazi ekhulula neKickOff.  

OLUNYE UDABA: AmaZulu azimisele ukumgcina uNdulula

“Izikhulu zaseBelgium sezike zafika nakuleli ukuzoba uBongani edlala imidlalo eyahlukene kanti sinethemba ukuthi kukhona okuzoqhamuka.

"Uma kushaya uJanuwari iqembu laseBelgium limfuna ngokushesha kuzomele lixoxisane naMaZulu ngesamba.

"Okufanayo kusengenzeka nakwiChiefs noma yiliphi elinye iqembu elimfunayo,” esho.

UNdulula ungomunye wabagadli abadlale indima ebalulekile ukuqinisekisa ukuthi iBafana Bafana iyakwazi ukuya e-Equatorial Guinea.

      - “Like” ikhasi lethu kuFacebook ukuze uthole izindaba ngolimi lwakho

      - Landela IzindabaNews24 kuTwitter