Ngokubika kwe-SoccerLaduma uCarlos Trevino ubhale enkundleni yokuxhuma uFacebook ekhononda ngemuva kokuba kumthathe isikhathi esingaphezulu kwamahora amabili ukuthi afike kwakhe ngenxa yesiminyaminya sezimoto ebeziyobuka lo mdlali edlala okokuqala kuleli qembu.
“Ngiyalizonda ibhola likanobhutshuzwayo nawonke umsangano oqhamuka nalo kodwa ngiyazama ukubekezela uma lidlala,” kubhala lo sopolitiki oyilungu le-National Action Party kuFacebook.
“Okwenze ngilizonde kakhulu wukuthi abantu bagcwala imigwaqo kuze kungahambeki nakahle….
OLUNYE UDABA: Isihlabani simangazile sijoyina elasehlathini
Konke nje lokhu bakwenzela ukubuka inkawu…..
Inkawu yaseBrazil.
Lokhu sekuphenduke isekisi,” kuqhuba umbhalo walo sopolitiki kule nkundla.
Nakuba kuvela ukuthi lo sopolitiki ugcine ewususile lo mbhalo kodwa leli qembu liveze kwi-website yalo ukuthi lifuna athathelwe iziyathelo zomthetho ngalo mbhalo okhombisa ukucwasa ngokwebala.
“Sizokwenza konke okusemandeni ethu ukuqinisekisa ukuthi uTrevino ubhekana nengalo yomthetho ngemuva kothuka umdlali wethu uRonaldp de Assis Moreira ‘Ronadinho’.
Sinxusa nabaholi bezwe balusukumele lolu daba,” esikhishwe yileli qembu kwiwebsite yalo.
Kuzokhumbuleka ukuthi kumangaze abaningi ngesikhathi lo mdlali eqoka ukuyodlala ezweni laseMexico ngoJulayi kulo nyaka njengoba eke wabalwa njengabanye babadlali abahamba phambili emhlabeni.
- “Like” ikhasi lethu kuFacebook ukuze uthole izindaba ngolimi lwakho