Uyinkakha uMeyiwa - Mahlangu

Johannesburg - Lowo owayisihlabani seKaizer Chiefs ne-Orlando Pirates, uJabu Mahlangu, naye usebhonge emswaneni ngokudlula emhlabeni kukaSenzo Meyiwa, kubika iSoccerladuma.

'UShuffle' ungomunye walabo abakholelwa ukuthi uMeyiwa ubezoba ngomunye wonozinti abaphambili kuleli.

“Lezi zindaba ngazithola ebusuku ngeSonto. Ngangiphuma eKimberly lapho kwakuqhubeka khona imidlalo yeMultiChoice Diski Challenge," usho kanje.

"Ngathola ucingo oluvela komunye umuntu owangitshela ukuthi, kukhona into embi  eyenzekile. Ngangicabanga ukuthi ukhuluma ngento eyenzeke lapho sasisuka khona eKimberly,” usho kanje.

Funda nalolu daba: Ngathengela uMeyiwa iKFC - Khune.

“Wangitshela ukuthi uSenzo akasekho emhlabeni. Wathi angivule umabonakude. Ngathi uma ngiwuvula nje, yilona daba olwaluhamba phambili,” usho kanje.

"Lento ayikholakali ngoba ubesefomini emangalisayo uSenzo. Ubeneminyaka engu-27 nje kuphela ubudala nokuyisikhathi onozinti abaningi abasuke sebevuthiwe ngaso,” kusho uMahlangu.

"Besisazobona okukhulu kuSenzo. UKhune ubesazoyilwela indawo yakhe. Bekuzoba ukuncintisana okuhle nokuyinto ebizolisiza kakhulu izwe lethu. Ubeyiqhawe kumina. USenzo ubeyinkakha,” kusho uMahlangu.

 – "Like" ikhasi lethu ku-Facebook uze ukwazi ukujoyina inkulumo ngolimi lwakho.

 – Landela IzindabaNews24 kuTwitter (@IzindabaNews24).