Cape Town – Umdlali wasesiswini we-Orlando Pirates, uThabo Rakhale, uyavuma ukuthi ukushaya kwabo iGolden Arrows kumqhudelwano we-Telkom Knockout umuthi ebebewudinga njengoba bebheke emdlalweni we-Soweto Derby ngoMgqibelo.
AMabhakabhaka adlulele emzuliswaneni olandelayo kulandela ukushaya i-Arrows ngo-2-1 ngegoli lika-Mpho Makola kanye nelika-Luvuyo Memela.
Lo mphumela usho ukushintsha kwezinto kuleli qembu njengoba bese lidlale imidlalo emithathu ilandelana lidlala ngokulingana, yize noma lingakashaywa emdlalweni ye-Absa Premiership kule sizini.
OLUNYE UDABA: Uchitha eyokuziphilisa nge-car wash obekwi-Pirates
URakhale uthi lokhu kunqoba kufike ngesikhathi esifanele ngaphambi komdlalo nezimbangi ezinkulu ezingomkhaya, iKaizer Chiefs.
“Ukunqoba yinto ebesiyilwela emdlalweni we-Arrows, futhi besazi ukuthi i-Arrows izosinika umdlalo onzima, futhi bakwenzile,” lo mdlali oneminyaka engu-26 ubudala utshele iVodacom Soccer.
“Emva kokudlala ngokulingana imidlalo emithathu ilandelana yeligi, ukuwina yinto ebesiyidinga, futhi sekunyuse umdlandla kuthina ngaphambi kwe-Soweto Derby ezayo.
“Vele iSoweto Derby ayifani nje nanoma yimuphi umdlalo we-PSL kubadlali beChiefs nePirates, kanye nabalandeli,” kuqhuba uRakhale.