Publications
Partners
Cape Town – Umqeqeshi weMamelodi Sundowns, uPitso Mosimane, usephumele obala wathi akanazo izinhloso zokubuyela emuva abe ngumqeqeshi weBafana Bafana, njengoba kunemibiko ethi ungomunye wabaqeqeshi abagaqelwe yiSouth Africa Football Association (SAFA) ukuba athathe izintambo eqenjini lesizwe.
UMosimane uyena owayengumqeqeshi weBafana kusukela ngonyaka ka-2010 kuya ku-2012 ngaphambi kokuba akhonjwe indlela ngenxa yemiphumela engemihle.
Lo mqeqeshi oneminyaka engu-52 ubudala uthi luyamjabulisa uthando kanye nenhlonipho ayithola kumaBrazilians futhi usenikele ikusasa lakhe kulabo mpetha be-CAF Champions League bonyaka ka-2016.
OLUNYE UDABA: Sekuseduze amenyezelwe umqeqeshi omusha weBafana
“Ngijabule kakhulu kuMamelodi Sundowns okwamanje,” kugcizelela uMosimane.
“Ngiyahlonishwa la futhi ngiphethwe kahle. Nginomndeni omuhle la futhi abalandeli bayangithanda.
“Ngaphandle kweSundowns kunabalandeli beChiefs kanye nePirates abangangithandi ngempela kanti iBafana Bafana iyiqembu labo lesizwe.
“Angifisi ngempela ukubuyela emuva. Kuhle ukuhlala la uthandwa khona.
IBafana Bafana ibilokhu ingenaye umqeqeshi kusukela kwaxoshwa uShakes Mashaba ngasekupheleni kukaDisemba.
Ngokwemibiko, iSAFA kulindeleke ukuthi imemezele umqeqeshi omusha kuleli sonto.
Le nhlangano yebhola kuleli isanda kukhipha uhlu lwabaqeqeshi okuzokhethwa kubo umqeqeshi weBafana kanti kulolu hlu akekho noyedwa umqeqeshi wakuleli.
