Johannesburg – Umqeqeshi uKjell Jonevret uyavuma ukuthi kunezinkinga i-Orlando Pirates ebhekene nazo ezenza ukuthi le kilabhu ingabi sezingeni elifanele umlando wayo.
Yize iPirates isahlulwe kanye emidlalweni engu-10 kuyo yonke imiqhudelwano ngaphansi kwesandla sikaJonevret, leli qembu namanje alenzi kahle ku-PSL.
Lokhu kudala ukuthi ashabalale amathemba omlando waleli qembu wokuba yilona kuphela elihlale livala isizini likuTop 8 ku-PSL, kubika iKickOff.com.
Nokho ukufinyela kwePirates kuma-semi-final eNedbank Cup kunikeza ithemba lokuthi leli qembu lingase lithole ithuba lokuphakamisa inkomishi kule sizini.
OLUNYE UDABA: IPirates ifaniswe nenja engenamazinyo
“Ngihlezi ngingumuntu ojabule nobheka okuhle ngazo zonke izikhathi, kepha iqiniso lihle nje ukuthi iPirates ayibalwa namakilabhu amakhulu njengamanje,” kusho uJonevret.
“Ngiyavuma izikwadi zamaqembu e-PSL azifani, kepha nathi kumele sinyuse amasokisi,” esho.
Uthe akalilahlile ithemba njengoba iqembu lisasalelwe yimidlalo eyisithupha okumele liyidlale, wathi kuzomele lisebenzise wonke amathuba eliwatholayo.
“Ngiyajabula ukuthi sifinyelele kuma-semi-final eNedbank, kepha ithemba angililahlile ekutheni sizoqeda kuTop 8. Kuzomele sisebenze kanzima futhi sidlale ibhola eliyingcwenga ukusuka kule ndawo esikuyo,” esho.