UMotsepe uthi bazohlukaniselana u-R20m abadlali be-Sundowns

Cape Town – UMengameli weMamelodi Sundowns, uPatrice Motsepe, usedalule ukuthi isamba semali engu-R20 million etholwe yileli qembu ngokunqoba isicoco seCAF Champions League, izohlukaniselwa abadlali.

AmaBrazilians anqobe lesi sicoco esikhulukazi samakilabhu e-Afrika ngokushaya izinkuzi zase-Egypt, iZamalek, ngo-3-1 ngokomphumela womlenze wokuqala nowesibili, ngeSonto.

Manje iSundowns isijoyine i-Orlando Pirates ngokuba yiwo womabili la maqembu aseNingizimu Afrika asenqobe lesi sicoco njengoba iPirates yenza okufanayo ngonyaka ka-1995.

OLUNYE UDABA: I-Sundowns ethubeni lokuthola u-R22m

Kodwa-ke uMotsepe, okuyisiqumama saseNingizimu Afrika esinomcebo olinganiselwa kwizigidigidi zamarandi esathenga le kilabhu ngonyaka ka-2004, uthi kuzoba kubadlali beqembu ukuthi bazihlukanisela kanjani le mali.

Ngaphezu kwalokho, lo somabhizinisi oneminyaka engu-54 ubudala ucele labo abazohlomula ukuba batshale imali yabo ngobuhlakani.

“Wonke u-$1.5 million (olInganiselwa ku-R20 million), owabo wonke. Sekumele manje bahlale phansi bese beqala ukucabanga ngokuthi bazoyihlukaniselana kanjani leyo mali,” uMotsepe utshele iTimes Live.

“Ngithe nje kubona, “Bafwethu, ningayimoshi imali manje. Thathani enye yaleyo mali bese niyayitshala.”