Johannesburg - I-ANC Youth League isiziqhelelanisile ngokuphawula okwenziwe yilowo oyiNational Convenor uMzwandile Masina akwenze enkundleni yokwabelana ngezithombe i-Instagram.
UMasina ufake isithombe salowo owayenguNgqongqoshe wezobuNhloli uRonnie Kasrils nowayeyisekela lowezeMpilo uNozizwe Madlala-Routledge siphelezelwa ngumbhalo obagxekayo ngokukhankasela ukuthi abantu bone amavoti abo.
Lo mbhalo ubufundeka kanje: "I-ANC yanikeza laba bobabili ithuba lokuthi baziwe. Bazonela bona. Esinye iseqamgwaqo saxoshwa nguMengameli Thabo Mbeki kwathi esinye sasula ngemuva kokukhishwa esikhundleni kukaMbeki.
"Manje sebenza noma yini ukuze baphinde bavele kumabonakude ngokuthi baggqugquzele abantu ukuthi bangayivoteli i-ANC. Abantu bafela lo mzabalazo nenkululeko abakudelelayo."
I-ANCYL ixwayise amalungu kanye nabaholi bayo ukuthi baqaphele indlela ababhala ngayo ezinkundleni zokuxhumana akukhathaleki noma bebhala emakhasini aqondene nabo ngqo.
"Njengamalungu e-ANC Youth League, sibahlonipha kakhulu abantu abadala futhi siyabanika indawo yabo," kusho okhulumela lolu phiko uBandile Masuku esitatimendeni.
UKasrils noMadlala-Routledge bacele abantu bakuleli ukuthi bazwakalise ilaka labo ngenkohlakalo nokukhwabanisa ngokuthi bone amavoti abo.
- “Like” ikhasi lethu kuFacebook ukuze uthole izindaba ngolimi lwakho
- Landela IzindabaNews24 kuTwitter