Johannesburg - IJacaranda FM isihlawuliswe u-R5 000 ngemuva kokuthi owethula uhlelo ekhulume ngesigameko sabantu abalala nezilwane, kusho abeBroadcasting Complaints Commission of South Africa (BCCSA).
"Sesibone kufanele sibahlawulise ngo-R5 000 okumele ukhokhwe ngomhlaka-30 ku-Agasti noma ungakashayi," kusho uSihlalo wekhomishana uSolwazi uKobus van Rooyen.
Lokhu kwenzeke ngemuva kokuba umlaleli waseNelspruit efake isikhalazo ngomethuli wohlelo uRon Olivier nokuthiwa wafunda imiyalezo ehlazayo yabalaleli emsebenzini abayenzayo, ekufundeni kwakhe wabe esekhuluma kabi ngomlisa owathi wabamba umpheki ekhishini ezitika ngocansi nenkukhu.
Lesi sikhalazo safakwa ngenxa yokuthi kwakukhona izingane emotweni ngesikhathi ekhuluma.
"U-Olivier wenza lolu daba inhlekisa kodwa ngibona kungalungile ukwenza inhlekisa ngezimo ezinje emini njengoba uhlelo lulalelwa iwowonke umuntu."
Eqhuba ebhalela abekhomishana lowo owafaka isikhalazo wathi: "kwasekufanele ngichazele izingane ukuthi uthini lo methuli wohlelo uma esho kanje."
Ofake lesi sikhalazo ubefuna lo methuli amiswe emsebenzini kuthi isiteshi sixolise emoyeni.
UVan Rooyen ube esekhipha isinqumo sokuthi u-Olivier waba budedengu ngalolu daba.
Kubikwe ukuthi u-Oliveir usesulile emsebenzini.
- “Like” ikhasi lethu kuFacebook ukuze uthole izindaba ngolimi lwakho- Landela IzindabaNews24 kuTwitter