Inyuvesi inqamule ubudlelwano noBill Cosby

New York – Isikhungo semfundo ephakeme iNyuvesi yaseMassachusetts-Amherst isigqabule igoda lobudlelwano nosomahlaya uBill Cosby kulandela izinsolo zabesifazane abahlukene abamsola ngokubahlukumeza ngokocansi.

Okhulumela le nyuvesi utshele iBoston Globe uthi ngoLwesithathu izikhulu zayo zinxuse uCosby ukuba ashenxe esikhundleni sokuba ngomunye woSihlalo womkhankaso wayo wokuqoqa isikhwama semali elinganiselwa ku$300 million.

Kubikwa ukuthi lo somhlaya odume umhlaba wonke akazange asiphikise isinqumo sale nyuvesi nebala washenxa.

UCosby wathola iziqu zakhe zeMaster nezobudokotela kwezeMfundo kusona lesi sikhungo kanti yena nomkakhe sebeke basixhasa ngezizumbulu zemali.

OLUNYE UDABA: Usomahlaya uthi uReeva wazenza yena ngokumehlela

UMmeli Jikelele weMassahusetts uMartha Coakley uthumele incwadi kule nyuvesi eyinxusa ukuthi inqamule ubudlelwano noCosby.   

UCoakley uthe nakuba uCosby engalahlwa yinkantolo ngalezi zinsolo zokuhlukumeza ngokocansi abesifazane kodwa ukuthinteka kwegamalakhe kulezi zinsolo kuhambisa umyalezo ongemuhle kubantu.

Uqhube wathi lesi sikhungo sihamba phambili ekulweni nokuhlukunyezwa kwabantu besifazane nganoma yiluphi uhlobo.

Ummeli kaCosby uthe ikhasimende lakhe libhecwa ngobende inyama lingayidlanga ngoba abukho umfakazi bokushiwo yilaba besifazane abasola lo somahlaya.

   - “Like” ikhasi lethu kuFacebook ukuze uthole izindaba ngolimi lwakho

    - Landela IzindabaNews24 kuTwitter