Isihlabani siphume sinyobozela sihhahhanyezwa esiteji

Port Elizabeth - Siphume sesinyobozela esiteji isihlabani somculo uNtando Bangani ngemuva kokuhhahhanyezwa abalandeli emcimbini kaMiss Amathole Hertage Festival eNyuvesi yaseFort Hare ku-Alice e-Eastern Cape.

Ngokubika kweDaily Sun lesi sihlabani se-Afro Pop sijwayele ukuhlanyisa abalandeli uma sinandisa ikakhulukazi abesifazane kwazise sicula kakhulu ngezingoma zothando kodwa ngempelasonto sihlangabezaneni nesimo esingasijwayele.  

UNtando ungomunye wabaculi abathandwa kakhulu kulo masipala waseMathole kwazise abalandeli bajwayela ukumamukela ngenkulu inhlokomo.

Kulo mcimbi ubeqashwe ukuzonandisa nabanye abaculi abadumile okubalwa kubo uNathi wodumo lukaNomvula, The Soli noSiphokazi, abashaye into ecokeme abalandeli bakhombisa ukubajabulela.

Kubikwa ukuthi abantu bakhombise ukungamjabuleli lo mculi njengoba abanye baze bakhala ngokuthi ubengazihlelele futhi bekubonakala ukuthi umqondo wakhe ukude kunalapho abenandisa khona.

OLUNYE UDABA: OweKwaito usaluphika olwe-speedpoint

Kuzo zonke izingoma abezicula ubengaziqedi kwazise abantu bebemfuna ephumile esiteji.

Ngokombiko abanye babantu abebekhona kulo mcimbi bazwakale sebememeza bethi "Singakubetha xa sithanda."

Umsakazi woMhlobo Wenene uBulelani Koyo utshele abalandeli ukuthi kube nobuhixihixi wezobuchwepheshe ngesikha uNtando enandisa yingakho engazwakalanga kahle.

NoNtando ukuqinisekisile ukuthi imishini yokunandisa ibingaxhunywanga ngendlela efanele ngesikhathi kunandisa yena.

"Ngizizwa ngidumele ngokwenzekile ngoba bekungeyona inkinga yami kodwa ibe kulabo abebengidlalela ama-CD ami.

Ngiyaxolisa kakhulu kubalandeli bami ngiyafisa ukubuyela emuva ngiyobathoba izinhliziyo."

    - “Like” ikhasi lethu kuFacebook ukuze uthole izindaba ngolimi lwakho

     - Landela IzindabaNews24 kuTwitter