Johannesburg - Umsakazo uKhozi FM maduze luzokwenza izinguquko okwesibili kulo nyaka.
ISunday Sun ibika ukuthi ngenyanga ezayo kuzoba nezinguquko ezinkulu emsakazweni uKhozi FM, ngengoba abanye abasakazi bezokhishwa ngenxa yokwehla kwezibalo zabalaleli.
Kubikwa ukuthi ngenyanga edlule umsakazi weVuka Mzansi uSipho Mbatha, “DJ Sgqemeza”, kanye nomsakazi wohlelo iWoza Nabangani Bakho, uKhathide Ngobe, odome ngelikaTshatha,batshelwe ukuthi kuzomele banyuse amasokisi ngoba siyehla isibalo sabalaleli.
ISunday Sun ikhulume nowayengumdidiyeli weVuka Mzansi, uSandile Mdlalose, othe: “Sekuphele izinyanga ezimbili manje ngagcina oKhozini FM ngenxa yezizathu zami, engingeke ngikwazi ukukutshela zona. Angikajoyini iPower FM okwamanje, engikwaziyo nje ukuthi kuzoba nezinguquko oKhozini FM.”
Funda nalolu daba: Umlingisi uthi ingane yakhe ayizi ukuzombona egula
Omunye umthombo uthe: “Abaphathi sebehlulekile ukusindisa uDJ Sgqemeza noTshatha ekulahlekelweni yizinhlelo zabo.”
Umthombo uthe: “UDJ Sgqemeza noZama abazwani kulolu hlelo lwasekuseni. Akukho nhlobo ukubambisana. Kanti ohlelweni lwantambama abalaleli bayaphoqeleka ukuba balalele izihloko zokusuku ezibhedayo.”
Okhulumela iSABC uKaizer Kganyago ukuphikile ukuthi lesi siteshi somsakazo sizokwenza izinguquko.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.