Publications
Partners
Johannesburg - Ziya ngokuqina izindaba zokuthi uMenzi Ngubane wodumo lukaSibusiso Dlomo kwiGenerations usezingxoxweni noMfundi Vundla zokujoyina iGenerations: The Legacy!
Ngokubika kweSunday Sun uMenzi obedume ngelikaNgamla kulo mdlalo kunezinsolo zokuthi useke wahlangana noVundla bakhumelana umlotha.
UNgubane ungomunye wabalingisi abangu-16 abakhonjwa indlela kulo mdlalo ngemuva kokukhala ngempatho yenkampani i-MMSV Productions ekhiqiza lo mdlalo.
Kuzokhumbuleka ukuthi ngonyaka owedlule uVundla waphumela obala ngokuthi kunomlingisi amsiza ngokumkhokhela izindleko zasesibhedlela kodwa wangalidalula igama lakhe.
Umthombo waleli phephandaba udalule ukuthi ukukhumelana umlotha kukaNgubane noVundla kungaphezulu.
“UMenzi sekuphele izinyanga engasebenzi.
Ngicaba ukuthi impilo isiqala ukuba nzima kuyena njengoba enezidingo okumele azikhokhele,” kusho umthombo.
OLUNYE UDABA:Ziyabhimba izinto emzini ka'Ngamla'
Uqhube wathi maduze lo mlingisi uzobuyela kulo mdlalo ngoba noVundla waphumela obala ukuthi akananxa noNgamla usengasebenza naye futhi.
Ethintwa uVundla uthe:
“Angimubambele amagqubu uMenzi. Ungumfowethu.
Saba nokungaboni ngasolinye nje kuphela.
Uyazi ukuthi ubudlelwano bethu bukuphi,” kusho uVundla.
Mayelana nokuthi usengaphinde asebenze noMenzi uVundla ukubeke kwacaca ukuthi:
“Ngiyohlale njalo ngizimisele ukusebenza noMenzi.
Ngiyamhlonipha kakhulu.”
Kuleli sonto uMenzi uzwakale ethukile ngalezi zindaba:
“Ngagcina ukhuluma naye ngaphambi kokuthi angixoshe nge-email.
Angazi lutho ngokushintsha kwenhliziyo yakhe muva nje.”
- “Like” ikhasi lethu kuFacebook ukuze uthole izindaba ngolimi lwakho
