Johannesburg – Sekuvele ezithi uMinnie Dlamini ujikijelwe ngebhodlela ngesikhathi egubha usuku lwakhe lokuzalwa ehlanganisa iminyaka engu-24 yobudala, eGoli.
Lokhu kuthiwa kwenzeke kwenye yezindawo zokuzithokozisa eziseqophelweni eliphezulu iKong eRosebank.
Ngokusho kwabeSunday World, lo mlingisikazi nomethuli wezinhlelo kumabonakude ubenokuhilizisana nomunye wabesifazane kusempondozankomo ngoMgqibelo.
Abaphathi bakaMinnie bakhiphe isitatimende esiqinisekisa lesi sehlakalo: "UMinnie ukuqinisekisile ukuthi ugqenywe ngebhodlela elingenalutho ngumhlaseli wakhe eKong. Ngaleso sikhathi uMinnie ubeyisitatanyiswa njengoba phela bekugujwa usuku lwakhe lokuzalwa.
Isitatimende siqhube sathi: "UMinnie uyakuqonda ukuthi ikilabhu nabe-SAPS bakwazile ukuqhuba uphenyo olunzulu bagcina bekwazile ukuthola umhlaseli wakhe.
"Angeke asaphawula ngalolu daba njengoba seludluliselwe kwabe-SAPS nabeNational Prosecuting Authority."
ISunday World ibike ukuthi lo ohlasele uMinnie uphinde wambombothela ngengilazi ebinesiphuzo sikagologo othakwe ngejusi ngesikhathi kuqubeka ingxabano.
“Like” ikhasi lethu kuFacebook ukuze uthole izindaba ngolimi lwakho