Johannesburg - Kumenyezelwe abaqokwe emcimbini wezindondo obizwa nge-ANN7 South African of Year ozobe ubungaza unyaka wesibili kulo nyaka.
Ngokubika kwe-ANN7.com lo mcimbi uhlose ukubungaza abantu baseNingizimu Afrika abenza imisebenzi encomekayo emikhakheni eyahlukene.
Abaqokelwe kulo mcimbi bamenyezelwe ngoMsombuluko kusihlwa kanti babalelwa ku-63 osaziwayo abaqokiwe emikhakheni eyahlukene.
Osaziwayo u-AKA, Cassper Nyovest, Terry Pheto, Nomzamo Mbatha, Nandi Mngoma noJonathan Boyton-Lee bazoqhudelana emkhakhwe weCelebrity of the Year, kuthi u-AB de Villier, Duane Vermeulen, Gift Kelehe, Janine van Wyk, Schalk Burger, Tefu Mashamaite noTeko Modise babangisane kowezemidlalo.
OLUINYE UDABA: Izigebengu zintshontshe imali yempesheni KwaMashu
Isiphalaphala sentokazi esidume ngoQueen B uBonang Matheba yena uzobangisana nabanye abanedumela okubalwa kubo uBrian Molefe, Ephraim Shakes Mashaba, Imtiaz Sooliman, Nkosazana Dlamini-Zuma, Rolene Strauss noProf Salim S Abdool Karim emkhakheni omkhulu weSouth African of the Year.
Kuzokhumbuleka ukuthi ngonyaka owedlule umkhakha weSouth African of the Year wanqotshwa uMvikeli woMphakathi uThuli Madonsela.
Umcimbi walo nyaka wokumemezela abadle umhlanganiso uzoba ngomhlaka 17 ku-Okthoba eTicketpro Dome eGoli .
Kulo nyaka kulindele ukuthi kunandise abaculi okubalwa kubo u-AKA, The Soil, Chiano Sky nabanye kanti kulindeleke ukuthi kuphinde kumenyezelwe nesihlabani saphesheya kwezilwandle esizonandisa kulo mcimbi.
- “Like” ikhasi lethu kuFacebook ukuze uthole izindaba ngolimi lwakho