Johannesburg – Ufuna ukulolongwa uBouga Luv umculi wekwaito wodumo uLvovo Derrango onesifiso sokugijima iComrade Marathon kulo nyaka ngokusho kombiko.
Ngokubika kweSunday Sun uDerrango osanda kuhlabana nendondo yamaMetro FM Awards uqale lo nyaka efukuza kanzima ejimini elungiselela ukugijima umjaho wedumela osuka eMgungundlovu olubangisa eThekwini.
Kulo nyaka uDerrango ogamalakhe langempela nguThokozani Ndlovu ubesejwayele ukufaka izithombe zakhe ezilolonga ezinkundleni zokuxhumana.
Ngokuthola kwaleli phephandaba uDerrango uqale ukungalubhadi ejimini ngemuva kokunqoba indondo yamaMetro kanti manje kubukeka sengathi useqala ukusalela ngemuva ezinhlelweni zakhe.
“Isikhathi asisekho uma esazimisele ngempela ukugijima lo mjaho njengoba esebuyele ekudleni ukudla okunamafutha futhi engasayi nasejimini,” kusho umthombo unanela ngokuthi umuntu ozamayo ukumsiza yimeneja yakhe uSthabiso.
OLUNYE UDABA: OweKalawa uqokelwe owezindondo eLimpopo
Omunye umthombo uthe uDerrango usezinhlelweni zokuthola uKabelo Mabalane (Bouga Luv) ukuze amlolonge ngaphambi kwalo mjaho.
Ethintwa uLvovo uvumile ukuthi isikhathi sesincane.
“Ngiphazanyiswe yimicimbi zokubungaza ukunqoba indondo yamaMetro ngaphutha ejimini ngaqala ukudla inyama nokunye okungalungile.
Kodwa ngisazimisele ukuqhubeka nalokhu ebengikuhlelile ngoba angikwenzeli mina kodwa ngisiza umphakathi,” esho.
“Ngibukela kakhulu kuBouga Luv futhi ngingajabula uma engase angilolonge.”
UBouga Luv ethintwa ngalokhu uthe:
“Ngizokhuluma no-Lvovo uma sengumbona emcimbini wamaSouth African Music Awards.”
- “Like” ikhasi lethu kuFacebook ukuze uthole izindaba ngolimi lwakho