Johannesburg- IThe Juice isibikelwe ukuthi umlingisi weRhythm City, uLele Ledwaba, uthola ukwelashwa esibhedlela ngemuva kokulimala kulandela ukushaywa yiphoyisa lesifazane ngoMsombuluko ebusuku.
Ngokusho kwemenenja kaLele, uWesley Mark Gainer, uLele ubelibhekise ekhaya ephuma emsebenzini ngoMsombuluko ngesikhathi emiswa yiphoyisa lesifazane.
Ekhuluma neThe Juice, uWesley uthe uLele umiselwe ukuthi akamanga ku-Stop Street.
Funda nalolu daba: IGagasi Fm kumabonakude
"Ngokwazi kwami, uLele ucelwe ukuba aphume emotweni yakhe, nokuthe uma esebuza igama lephoyisa, lavele lavuka umbhejazane, ngemuva kwalokho lambamba kabuhlungu uLele.” kusho Wesley.
UWesley uthi uLele uyiswe esibhedlela nokuyilapho elulamela ngakhona njengoba ephuke esihlakaleni waphinde wahuzuka nasehlombe.
Kukholakala ukuthi abameli baLele bazolulandelela lolu daba.
Okhulumela amaphoyisa kamasipala, u-Edna Mamonyane, uthe akazi yena ngalesi sehlakalo ngakho angeke aphawule kuze kube uthola imininingwane egcwele.
– "Like"
ikhasi lethu ku-Facebook uze ukwazi ukujoyina inkulumo ngolimi lwakho.