Dueban - Sengithule kwanela ninephuza uSfiso Ncwane nizikhulumela ukuthanda kwenu njengodokotela.
Lithi iBhayibheli hlonipha uyihlo nonyoko ukuze izinsuku zakho zande ezweni, alisho lutho ngokubondla.
Kunalokho ukondla kuvela laphaya ezifungweni zomshado lakuyalwa khona indoda ukuthi mayondle umkayo ngandlela zonke ngaphambili nangemumva nanhlangothi zonke!
Yize noma ngikuhlaba ukudiza ngonyanyavu lwemoto kumfundisi okwenziwe nguSfiso Ncwane, ngibona kungukugagamela ukuthi bekumele agcwalise i-fridge likanina ngaphambi kokwenza loko.
Lo mama okuthiwa unina kaSfiso akagugile neze usemncane kabi, kumele engabe uyakwazi ukuziphantela.
Funda nalolu daba: Mhleli, nginenkinga nomazisi
Kakade ubani owathi kuyijoka lethu ukondla abazali?
Sizoyondla siyikhulise nini eyethu imindeni uma sizothembuza sondle ekhaya nakwakho?
Inerobhani le ndaba yokondla ekhaya.
Ningizwe kahle angisho ukuthi uma senikhulile hambani niyodla imali nononkiloyi emadolobheni nikhohlwe yikhaya.
Kepha kubalulekile ukuthi nabazali bangabi yitshe nomthwalo emahlombe ezingane zabo.
Yize ngingeke ngathi yisiko elimile kepha abelungu uma sebeqedile isikole kubhekeke ukuthi baphume inxiwa bazimele.
Kangangokuba kuye kwenziwe ihlaya abantu abahlanganisa iminyaka engamashumi amathathu besahlala ekhaya nabazali. Lokho kusho ukuthi izingane ziphoqelekile ukuthatha izinqumo ezisile ngezimpilo zazo zokuzimela.
Funda nalolu daba: Ayibhekisiswe eyabadwebi
Lo Sfiso osenyamanambana kwabaningi niyakhohlwa ukuthi uye lo owakha lowamuzi kanina, wawufaka konke okuphakathi kubalwa nalo i-fridge lelo osekuthiwa akasaligcwalisi…mameshane!!! Wayedliwe empini yini lo Sfiso wakhona, mhlambe wayenukwe eMbongolowane!
Le yokunikela kwakhe ngemoto eyakhe nomfundisi wakhe phumani kuyona.
Ubani nina onikhulumisayo ngalezinwele zenu zokudlala nalo mthuqasi eniwugcoba ebusweni, kubiza malini, hhe? Ningazonginyusela ushukela nina bo!!!
Disclaimer:INews24 iqhakambisa ukukhuluma ngokukhululeka nokuzwakaliswa kwemibono
eyahlukene. Lokho kuchaza ukuthi imibono yababhali bezingosi ezishicilelwe
kuNews24, akuyona imibono yeNews24.
– "Like"
ikhasi lethu ku-Facebook uze ukwazi ukujoyina inkulumo ngolimi lwakho.