Publications
Partners
Cape Town - "Amadoda ayizinja". Lawa ngamagama ajwayele ukusetshenziswa ngabanye besifazane asebebone lukhulu kwezothando.
Kubuhlungu ukubona owesifazane ehlukumezekile kwezothando njengoba uthando kumele luhambisane nenjabulo ngasosonke isikhathi.
Nakuba kubuhlungu ukuhlukunyezwa kwanoma yimuphi umuntu kodwa kubalulekile ukuthi abesifazane baqale babheke izindlela abakhetha ngayo abesilisa abathandana nabo.
NgoLwesibili mhlaka 25 kuNovemba kuqala umkhankaso waminyaka yonke obizwa nge-16 Days Against Women and Children.
Sihlezi sizwa izindaba ezibuhlungu ngalesi sikhathi abantu besifazane bephumela obala ngokuhlukunyezwa kwabo ngabesilisa abanobudlelwano nabo.
Mangikusho kugcwale umlomo ukuthi akekho owesilisa ovumelekile ukuthi ahlukumeze owesifazane nanoma ngaluphi uhlobo.
Sengikushilo lokhu nabo abesifazane make bazinuke amakhwapha ngezinto ezibahehayo kwabesilisa.
Lesi sihloko sinzima ngoba sithinta izinhlaka eziningi kubantu kanti kwabanye singavusa amanxeba ngenxa yalapho bephuma khona.
Kunabantu besifazane abahluleka wukukhetha uma kuyiwa ngasothandweni bese kuba buhlungu uma sebehlukumezeka othandweni.
Okubuhlungu wukuthi baphoxa inqwaba yabesilisa abazimisele ngabo bese bazikhethela izihogo uqobo lwazo.
Kunemibuzo ebalulekile okumele baqale bazibuze yona, yini ebaheha kwabesilisa abathandana nabo?
Yikuphi abakufunayo uma bengena othandweni?
OLUNYE UDABA: Ayiphele eyokubiza amadoda ngezinja
Uma kwenzeka izinto ezifana nalezi ngimane ngikhumbule elinye lamakhehla engake ngathamunda nalo, langitshela ukuthi nakuba bekhona abesilisa abayizinja ngezenzo kodwa okwenza konakale kakhulu wukuthi nabesifazane sebenothando okuyinto engaziwa emandulo.
Leli topane lakusho lokhu labe selingitshela ukuthi naseBhayibhelini akukho lapho kuthiwa abesifazane mabathande abesilisa kodwa kuqhakanjiswa ukuthi kumele bathobe bese bethanda izingane zabo.
Ngaphambi kokuthi uze ulibeke ngembaba ukuthi amadoda yizinja qala uzibheke indlela okhetha ngayo amadoda ngoba kungenzeka ukuthi uwena othanda lawa ayizinja.
Kungenzeka ukuthi inkinga ikuwena uqobo. Madoda masibathande abantu bethu bese nabo basithobele impilo iqhubeke.
Disclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Lokho kuchaza ukuthi imibono yababhali bezingosi eshicilelwe kuNews24, akuyona imibono yeNews24.
- “Like” ikhasi lethu kuFacebook ukuze uthole izindaba ngolimi lwakho
