Cape Town - Uma izibalo zithi kuyehla ukusetshenziswa kwamakhondomu, akumangazi-ke uma zithi siyakhula nesibalo sabantu abaphila negciwane lengculaza.
UMa wami usanda kungibuza ukuthi kudalwa yini abantu ababili bethi benegciwane lesandulela ngculaza kodwa bakwazi ukuzala ingane engenalo igciwane.
Kudingeke ngizame ukumchazela ukuthi igciwane liba segazini nakolunye uketshezi emzimbeni womuntu kodwa alubi khona eqandeni elakha ingane kanjalo nasesidodeni somuntu wesilisa.
UMa, ubuza nje sikhuluma ngezibalo zakwaHuman Sciences Research Council's (HSRC), ezithi bangu-6.4-million abantu bakuleli abaphila negciwane le ngculaza.
Kimi njengomuntu ongazazi kahle izibalo, lokhu kusho ukuthi abantu engihlangana nabo usuku nosuku bonke banalo leli gciwane.
Ngibe sengihlalwa kakhulu yindaba yobudlelwano babantu ababili omunye wabo enegciwane omunye engenalo.
Funda nalolu daba: Alikho icala ekuchitheni kuqala kunowesifazane
Umuntu omdala (uMa) ucishe wamelwa yinhliziyo sengimtshela ngohlelo lokuwashwa kwesidoda, uma izithandani zizama ukuthola abantwana, indoda inegciwane owesifazane engenalo.
Indlela angakholwanga ngayo, ngidlulele kontanga ngizama ukuthola ulwazi abanalo ngokuwashwa kwesidoda, nalapho ngithole ukuthi abantu abanalo ulwazi ngalobu buchwepheshe.
Zikhona nezinye izindlela zokuthi izithole umntwana ongenalo igciwane futhi zingatheleleni ngesifo.
Kulokhu ngihehwe kakhulu yindlela yokuwashwa kwesidoda (sperm wash).
Isidoda sifakwa emshinini sisefwe, sihlukaniswa noketshezi oluhambisana naso, okuyilo oluphatha igciwane.
Ngemuva kokuwashwa, siphinde sihlolisiswe kubhekwa igciwane, sibe sesishuthekwa esibelethweni sowesimame (In vitro fertilisation (IVF), kube ukukhulelwa kwakhe njalo lokho.
Asithandane, sakhe isizwe. Ozaziyo ukuthi unegciwane azinakekele avikele isithandwa sakhe siphinde sizale abantwana abayimiqemane.
Asixhumane ekhasini le Facebook Sis'Omdala noma ku-zanelewakwamtshali@gmail.comDisclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Lokho kuchaza ukuthi imibono yababhali bezingosi eshicilelwe kuNews24, akuyona imibono yeNews24.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.