Dear Mhleli,
Mhleli kwelakho elingungqa phambili ngithi ake ngithathe usiba qede ngigiye ngiqephuze kokushaqisayo okwenzeka kuleli elimagade ahlabayo.
Ngifuna ukuhlaba ngihlikize isenzo somdwebi u-Anton Kannemeyer ngokudicilela phansi isithunzi sikaMengameli uMnuz. J.G Zuma ngokudweba ubuntu abubize ngobaMengameli, asingashayelwa ihlombe lesi senzo esiyichilo ezweni kanye nakumanye amazwe.
Uma kusasiyilengelo lokuveza umbono likugunyaza kanjani ukwehliswa komuntu isithunzi,singasabheki ke nje ukuthi uMongameli lo odicilelwa phansi?
Le ndaba yalabadwebi ifuna ukufakelwa izibuko kwazise imidwebo yabo idicilela phansi isithunzi sikaMongameli wezwe.
Lo mbhemu osanda kudweba uMsholozi uthi ubekhala ngendlela umdwebo kaBrett Murray owaphathwa ngayo.
Ndlelani yokuveza ukunganeliseki ngokudweba ubuntu bukaMengameli?
Kuzokhumbuleka ukuthi no-Ayanda Mabulu wenza okufanayo eminyakeni edlule. Impela lamalungelo aqeda isimilo ebantwini.
Ake ucutshungulwe lo mthetho sivivinyo ogunyaza umuntu ukuba aveze uvolwakhe (freedom oexpression) ukuze kuzogwemeka onontandakubukwa abanjengoMabulu.
Ayiphinde ifakelwe izibuko imithetho elawula amaciko kuleli ikakhulukazi abadwebi ngoba kubukeka beyixhaphaza inkululeko yabo.
Ngokwase-Afrika ukudweba umuntu omdala eveze isitho sangasese kumbe ukuveza isithombe ehamba ngesudi yesele kuwukumhlambalaza futhi kukhombisa isimilo esixegayo.
Kuyangimangalisa uma nabadwebi abansundu sebenzisa okwabamhlophe.
Ukuba ntekenteke komthetho wezwe yikho okwenze ukuthi angafundi isifundo uBrett Murray owaqala wadweba uMsholozi eveze isitho sangasese, lokhu kuholele ekutheni osomathuba babadwebi abanjengoMabulu bakhwele bazehlele kuNxamalala.
Akuvinjwe ukwethulwa esidlangalaleni kwalo mdwebo.
Kazi kwakhala nyonini kuleli elikaMthaniya kwazise emazweni ase-Afrika oMongameli bahlonishwa impela kodwa kuleli akahlonishwa, ofuna ukukhwela adilike kuMengameli uyakwenza lokho ngaphandle kwenkinga.
Amaciko bese kuba sengathi avalwa umlomo kumbe avalelwa amathuba kanti kungenxa yokungakwazi ukusebenzisa kahle inkululeko abayinikeziwe.
Ngiphakamisa ukuthi asingasongi izandla lifa elikahunga noMageba, asikhuzeni lo mhlola osuqala ukuba yinsakavukela umchilo wesidwaba kungenjalo izwelethu lizolahlekelwa yisithunzi salo.
Awubhekisiswe lomthetho weFreedom of Expression ukuze kuzoncipha osomathuba abafuna ukuzakhela igama ngokudicilela phansi uMongameli wezwe.
Uma amalungu esishayamthetho ezoqhubeka nokuwuhlaba inhlali, impela kungekudala sizobona omunye omdwebi edweba uMengameli ehamba ngesudi yesele.
Obhalile,
S'bonelo K-Master Khumalo eNtuthuko oPongolo
Disclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Lokho kuchaza ukuthi imibono yababhali bezingosi eshicilelwe kuNews24, akuyona imibono yeNews24.
- “Like” ikhasi lethu kuFacebook ukuze uthole izindaba ngolimi lwakho
- Landela IzindabaNews24 kuTwitter