Banezinhliziyo ezimbi abalandeli nabalaleli

Durban - Banezinhliziyo ezimbi abalandeli futhi bahlale becuphe uchuku.

Namhlanje ngivuke ngafunda udaba oluthi umsakazo iMetro FM umkhiphile emoyeni umsakazi wayo u-Unathi Msengana, kulandela ukwethuka kwakhe umuntu othize enkundleni yezokuxhumana iTwitter.

Akusikho okokuqala sibona usaziwayo emiswa emsebenzini okanye exoshwa ngenxa yokuphendula kabi umuntu othile noma umlandeli.

Ngake ngezwa ngandlebenye kuthiwa uJacinta Ngobese waxoshwa ngemuva kokubhala kwakhe kaningi ningi egxeka uKell Khumalo ngesikhathi eshonelewe yisoka lakhe uSenzo Meyiwa.

Angazi kuyiqiniso kangakanani lokho…

Funda nalolu daba: Inhlonipho ayikho ezikoleni

Kukaningi ngifunda ngokuba nyamanambana kukaZama Ngcobo woKhozi FM, naye egxekwa abalaleli bomsakazo.

Umbuzo-ke usekutheni kungani abaphathi babheke kuphela isisebenzi ukuthi siphendula kanjani, ingakhulunywa eyomlandeli lo ohlokoloze usaziwayo wamfaka umunwe esweni.

Abalandeli nabalaleli bakhohlakele, banezinhliziyo ezimbi benjalo bahlale becuphe uchuku. Bathi bekutshela ukuthi bayakuthanda bebe bekubophela amanqina enyathi.

Ezinkundleni zokuxhumana bazenza bahle bazishaye sabantu abakubuyisa endleleni bebe beqale ngokudelela.

Uthi uma kuqonga intukuthelo utshela umuntu izindaba zakhe, abaqashi bangabe besabheka ukuthi indaba iqalephi, usaziwayo agcine elahlekelwa umsebenzi.

Abalandeli abayeke ukujwayela kabi osaziwayo ngoba begabe ngokuthi uma bebaphendula bazoxoshwa.

Disclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Lokho kuchaza ukuthi imibono yababhali bezingosi ezishicilelwe kuNews24, akuyona imibono yeNews24.

 – "Like" ikhasi lethu ku-Facebook uze ukwazi ukujoyina inkulumo ngolimi lwakho.

 – Landela IzindabaNews24 kuTwitter (@IzindabaNews24).