Cape Town - Omunye wabaphathi bami bakudala emsebenzini, wayejwayele ukuthi uma ngimbuza into ngomsebenzi aphendule athi: "Yekela ukungibuza izinto ezingenagqondo ngoba isikhathi sami sibiza kakhulu".
Yize lokho kwakungizwisa ubuhlungu, kodwa ngaze ngafunda ukuthi ngejwayele.
Ngikusholani lokhu? Isikhathi singenye zezinto eziyigugu esinazo ekumele sizisebenzise kahle, eqinisweni isikhathi sawo wonke umuntu siyabiza, yingakho nje kumele sisisebenzise kahle.
Sonke siyawazi amahora enza usuku, nezinsuku njalo ezenza iviki, izinsuku ezenza inyanga nonyaka njalo njalo. Kuyiqiniso izimpilo zethu zamanje zimatasa kakhulu ngoba abazali sebahlala besebenza bengabi naso nesikhathi abangasichitha nemindeni noma nabantwana babo.
Okuyiqiniso ukuthi sikhona isikhathi kukubona nje ukuthi benze isikhathi abazokwazi ukusichitha nemindeni yabo. Kumele bakwazi ukuthi isikhathi abanaso basicaze kahle senele zonke izinto okumele zenziwe.
Funda nalolu daba: Awukho umgqomo wokulahla umuntu 2
Kwesinye sezikole engisaziyo ingane ike yatholela umntwana esikoleni, uma othisha befonela abazali bengane baphika bama ngentaba kuthi ingane yabo ikhulelwe.
Uma seyize yamthola umntwana bathi bebengazange bayibona ngoba babuya emsebenzini bekhathele bese beyolala. Cabanga izinyanga eziyisishiyagalolunye zonke awukwazi ukwenza isikhathi nabantwana bakho.
Angibasoli abazali ngokuba matasa futhi uma bekhathele bayadinga ukuphumula, kodwa phela kukubo ukuthi benze isikhathi sokuhlala nemindeni yabo. Kukubo ukuthi bacane kahle isikhathi bese besisebenzisa kahle lesi abanaso.
Imizi eminingi ifile ngenxa yokungabi nasikhathi kwabazali, ifile imizi ngokungabi nasikhathi kwabantu abaganeneyo. Uthole umyeni noma unkosikazi uhlala ematasa ngezinto zomsebenzi noma ngokwamabhizinisi noma nabangani noma izinkundla zokuxhumana egcina engasakwazanga ukuthola isikhathi sikankosikazi noma umyeni wakhe.
Ukusebenzisa kahle isikhathi kusho ukuthi ngesikhathi esincane onaso wenze izinto eziningi, hlela izinto zakho ngokubaluleka kwazo uhlele nesikhathi onaso ukuze zenzeke zibe ziningi.
Yingakho nje ngisho umfundi ebhala isivivinyo kumele ahlele isikhathi azi ukuthi singakanani azosisebenzisa ukuphendula umbuzo ngamunye. Uthole umuntu emosha isikhathi esiningi entweni angayiqondi bese ethi uma eqeda ethi angikwazanga ukuphendula loya mbuzo olula ngoba isikhathi bese siphelile.
IBhayibheli elingcwele lithi kuMshumayeli 3:3 “Konke kunesikhathi sakho, yonke indaba inomzuzu wayo phansi kwezulu.” Kukangaki uzwa abantu bethi anginaso isikhathi?
Isikhathi sona sikhona kodwa sidinga ukuthi sisetshenziswe kahle? Hlela izinto zakho ngokubaluleka kwazo uzicanzele nesikhathi ngazinye ngazinye.
Ungaxhumana nombhali ku: patrickzikalala@yahoo.com
Disclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Lokho kuchaza ukuthi imibono yababhali bezingosi eshicilelwe kuNews24, akuyona imibono yeNews24.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.