Kuzoba isizini emnandi kubathandi bebhola kuleli

Durban - Angethulele isigqoko izikhulu zamaqembu ebhola likanobhutshuzwayo kuleli ngaphambi kokuqala kwesizini kodwa lesi sigqoko angisithuleli noma ubani kepha ilezo zikhulu ezibone kunesidingo sokuthi ziqashe noma zinike ithuba abaqeqeshi bakuleli ukuthi bazibonakalise noma baziveze.

Ngesizini ezayo ku-Psl amaqembu ayishumi nane kwayishumi nesithupha azoqeqeshwa abakuleli lokhu kusho lukhulu ebholenilakithi phakathi kokunye uthi ngeke abadlali bakuleli badlale isitayela sebhola lakwamanye amazwe phecelezi (iDirect football) kodwa sesizokwazi ukubona kuqhuma ibrashi, amatsamaya kanye namashibobo okuyindlela okudlalwa ngayo ibhola kuleli Nokuyinto eyenza umbukeli noma umthameli webhola athokoze ngoba ubuka into yasekhaya.

Lilamale kakhulu ibhola lakuleli ngenxa yokugcwala kwabaqeqeshi bangaphandle  njengoba bebefika kuleli bafake imfundiso nezinkolelo zebhola lamazwe abadabuka kuwona lokhu bekungabulali ibhola kuphela kodwa bekulimaza ngisho abadlali uqobo.

Ukukhumbuza nje ngesikhathi u-Ernest Mazinyo  Middendorp ethatha izintambo zokuqeqesha kubafana bokuthola noxolo wahlonza ngaphandle okwenyongo yenyathi uScara Ngobese ngenxa yokuthi udlala ibhola elinomjiko kwebe sekungufu kukaNgobese ebholeni lakuleli.

Ngicaba ukuthi nabaqeqeshi bakuleli abanikwe ithuba amakilabhu bayawuqonda kahle umthwalo nomqansa ababhekene nawo,Okokuqala nje kumele baziveze ukuthi bangcono noma abahlukile kunabaqeqeshi abadabuka emazweni angaphandle,baphinde basibuyisele nesithunzi sebhola kuleli.Ukwenza kahle kwabo kusho ukwenza kahle kwabadlali,amaqembu kanye nesizwe ikhakhulu kaz iBafana bafana.

Disclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Lokho kuchaza ukuthi imibono yababhali bezingosi eshicilelwe kuNews24, akuyona imibono yeNews24.

 - “Like” ikhasi lethu kuFacebook ukuze uthole izindaba ngolimi lwakho                                

 - Landela IzindabaNews24 kuTwitter