Cape Town - NgiyiNtsheb’emnandi impela kodwa ngiyimpohlwa angiganiwe, sengike ngazama hhayi kwaphika ukwenza.
Ngiyaye ngibabongele abaganwa qekelele bengaxhaswanga. Lo mqansa wokuganwa ukhwelwa ngamashinga kuphela, uma unguvothobele ngeke ulunge.
Ngiye ngiyihambele imishado, ngibuke ngijule ngithi kunzima ukuganwa.
Ngisho ngoba uma sibheka uthando olwabantu ababili, abahlanganela ukusungula umndeni ndawonye.
Ezikhathini eziningi laba bantu bavama ukuqala ebhodweni bebodwa ngasese, bese kuthi uma bevumelana kuyikhathi belobolana, iningi ngaleso sikhathi lisuke selize laba nabantwana.
Bese kuthi imindeni yabo kubalwa nabangani iphinda ize emcimbini womshado wabo izobheka ukuthi kudliwani, bagqokeni, injani imihlobiso, ubucwebe, izinga, yehheni webantu obani ubunja obungaka.
OLUNYE UDABA: Amadoda anesandla ekuhushulweni kwezisu
Isono salaba bantu ukuthi bayathandana manje sekumele bajabulise nina nonke?
Into eyenza ukuganwa kube nzima yizinto ozenzela abantu kunalezo ozenzela isithandwa sakho.
Uma ngiphinda ngiluthola olunye ubambo lwami mina ngiyolubamba ngesandla siye kwaHome Affairs sisayine amaphepha siphume lapho sidlule kwaShisa Nyama, sidle sisule umlomo sihambe siyokwakha umuzi.
Nazi izindleko zomshado ojwayelekile esengike
ngahlangabezana nazo, lezi eziphansi kunazo zonke!
R15 000 – Video & Photography
R12 000 – Venue
R25 000 – Décor, Chairs Tables
R30 000 – Food and Drinks, Utensils, Cake
R20 000 – Rings set
R 15 000 – Transport
R 10 000 – Sound
Le imali yosuku lomshado, angikubalanga ukulobola, ukwembesa nokuvama ukuphelezelwa yiyo yonke lenyovademu engiyibale ngenhla.
Yini singashintshi izinto, ke sixhase abantu abathandanayo abafuna ukushada, sibaxhase sibenzele umcimbi bangakhokhi ne-cent njengoba nenza njalo uma nenzela amashende enu ama-surprise birthday party, ama-baby shower.
Ngikhuluma ngokuxhaswa komcimbi womshado hhayi ukulobolelana.
- “Like” ikhasi lethu kuFacebook ukuze uthole izindaba ngolimi lwakho
- Landela IzindabaNews24 kuTwitter