Mhleli
Kwelakho eliyizwi labantu nelihamba phambili, ngithi ake ngithathe usiba qede
ngedlulise isicelo sami kubashayeli ngenxa yokukhathazeka ngesimo
esesiyinsakavukela umchilo wesidwaba.
Nginxusa abashayeli ukuba bahloniphe
imithetho yemigwaqo, babekezelelane, baqinisekise ukuthi baphumula ngokwanele
uma bezoshayela amabanga amade, kuze kugwemeke izingozi ezidlula neminingi
imiphefumulo zishiye imizi ivalwe ngehlahla.
Kuliqiniso elingephikiswe ukuthi
ziningi izimpilo ezilahleka ngalesi sikhathi sonyaka ngenxa yezingozi zomgwaqo
ezinye zazo ebezingagwemeka. Nginxusa uhulumeni nabakwaSidlodlo ukuba bangabi
nazwelo kubashayeli abashayela bedle amponjwana nabashayela ngesivinini
esiphezulu kakhulu, bagwetshwe kanzima abathi beshayela besebenzise
umakhalekhukwini.
Kungaba nomthelela omuhle ukwandisa izivimbamgwaqo kuzwelonke kuze kuzobanjwa izimoto ezilayisha ngokweqile, ezingekho esimweni sokuthwala
abantu kanti futhi kungancipha nabashayeli abandizayo.
Kuyosiza futhi nokuhlola
izimoto ezithwala umphakathi ukuthi zikulungele yini ukuba semgwaqeni kanti
futhi zisasesimweni esifanele yini ukuthi zingathwala umphakathi.
Izibalo
zakamumva zikubeka kucace ukuthi izingozi eziningi zimbandakanya izimoto
ezithwala umphakathi. Lokhu kulahlekisela imindeni ngabantu ababeka isinkwa
etafuleni.
Akubhekwe nezimoto ezinkulu ezithwala impahla, kubukeka sengathi
abanikazi bazo bakushaya indiva ukuqinisekisa ukuthi amaloli abo asesimweni
esifanele ukuba angaba semgwaqeni. Inhliziyo yami ivele idabuke kakhulu uma
ngicabanga izibhicongo zezingozi ezidalwa amaloli.
Ngifisa sengathi amaphoyisa
omgwaqo angatshalwa kusemanje, kugwemeke izingozi.
Nina bakaBhejane phum esiqiwini, bakaPhunga noMageba
kuwumsebenzi wawo wonke umuntu ukuqinisekisa ukuphepha emgwaqeni ngakho ke
ukuze izingozi zinciphe, kumele sonke sidlale indima futhi sibambisane
neziphathimandla.
Uhulumeni eyedwa angeke akwazi ukusindisa izimpilo zabantu
uma thina mphakathi singafaki isandla. Ingcabha ngiyishiya nawe mfundi weNews24, engungqaphambili.
Ozithobayo
Sibonelo " K-Master" Khumalo,
eNtuthuko oPongolo
Disclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Lokho kuchaza ukuthi imibono yababhali bezingosi eshicilelwe kuNews24, akuyona imibono yeNews24.
– "Like"
ikhasi lethu ku-Facebook uze ukwazi ukujoyina inkulumo ngolimi lwakho.