Publications
Partners
Kuyiqiniso elingephikwe ukuthi kusukela kwangena iqembu le-Economic Freedom Fighters neliholwa ngu-Julius Malema, ukusebenza kwePhalamende kuqale kwashintsha kwaze kwabe ligcina selingasabuseki.
Kwenzeka lokhu esihlale sikubuka kumaPhalamende amanye amazwe. Amaqembu aphikisayo aqale ayigxeka indlela i-EFF ebeyenza ngayo izinto, kodwa nawo agcine eseyithokozela le ndlela nokwenze agcine eseziphatha ngendlela eyodwa uma kunezinkulumo mpikiswano ngenxa yengcindezi abeyithola kwi-EFF nobekwenza sengathi ilona lodwa iqembu eliphikisayo ePhalamende.
Funda nalolu daba: Ugcwele ukungazi umuntu omnyama ovotela i-DA
Umhlangano abenawo usekela mengameli ube yimpumelelo kakhulu ngoba wonke amaqembu avumelene ngezindlela ezingabuyisa isithunzi sePhalamende, yize i-DA iphinde yashaya ingijikhwebu kokunye obekuvunyelwene ngakho.
Kuphinde kwangithokozisa ukubona ne-EFF iwuseka kakhulu lo mhlangano kanye nezinqumo ezithathwe kuwona, kodwa kuyasolisa ukwesekwa kwe-ANC ngabe i-EFF kulokhu.
Phakathi kwezinqumo ezithathiwe ukutholakala kwesisombululo sezepolitiki odabeni lwe-EFF esihlanganisa ukuhoxiswa kwamacala abethweswe amalunga aleli qembu ngesehlakalo asenza sokuphazamisa uMengameli Jacob Zuma mhla ephendula imibuzo ePhalamende ngenyanga ka-Agasti kanti lamacala abezoholela ekumisweni kwalamalunga isikhathi esingangenyanga engalubhadi ePhalamende kanti futhi engaholi.
Yize abe-EFF bekuphika lokhu, kodwa cishe yisona sinqumo esibathokozise kakhulu lesi ngoba kuze kube iPhalamende alisabuseki nje yingenxa yawo la malunga asukuma aphazamise ukusebenza kwalo uma izinto zingenzeki ngendlela ethandwa yiwo.
Ngemuva kwengijikhwebu ye-DA, owe-ANC usukumile ethi obekuvunyelwene ngakho kuhle kuphele namacala e-EFF abuyiselwe ekomidini ebeliphenya ukuziphatha kwawo, kodwa i-EFF ibilokhu imile ithi akungasukwa esivumelwaneni somhlangano ababenawo nosekela mengameli yaze yagxeka i-DA ngokushaya ingwijikwebu.
Lokhu kungenza ngisole ukuthi lo mshado wabo wesikhashana ne-ANC baweseka ngoba bengafuni ukuzithola begwetshwa ngamacala abalahlwa ngawo. Ngaphandle kwalokhu kungithokozisile ukuzwa izinkulumo ebeziqhamuka emaqenjini aphikisayo ikakhulukazi i-COPE kanye nayo i-EFF ePhalamende, kangangoba uma zingalandelwa lingabuyelwa isithunzi iPhalamende.
* Ungaxhumana noSboniso Zungu ku-sbo1992@gmail.com
Disclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Lokho kuchaza ukuthi imibono yababhali bezingosi eshicilelwe kuNews24, akuyona imibono yeNews24.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.
