Cape town - Kunabantu abayosala bebambe i-video kaS’thembiso Zondo enqunu yena esebambene noNkulunkulu.
Umfundisi uZondo uxolisile kubantu ngesenzo sakhe. Nakuba engazange enabe ngokuningi, kodwa uxolisile futhi akumele thina njengabantu sifune imininingwane egcwele ngakwenza ngoba asithinteki ndawo.Phela umfundisi akonanga thina bantu, kodwa wone uNkulunkulu; akadlwengulanga, kodwa udicilele phansi igama loMdali nebandla lasemazulwini.
Kungenzeka ukuba uZondo ufebile noma uthenge umqwayizi njengokuba abantu besho kodwa engikwaziyo ukuthi uxolisile futhi noNkulunkulu umxolele.
Kuyacaca ukuthi umuntu owaganga noZondo, uma kungukuthi waganga naye, wakwenza lokho enenhloso yokudicilela igama lakhe, ngoba ukuba bekungenjalo ngabe abayikhiphanga i-video.
Kungenzeka ukuthi lowo muntu wajabula kuvela ubuze bukamfundisi kodwa nginesiqiniseko sokuthi manje sezehlile iziqhomo ngoba phela simbonile umfundisi ephumela obala, exolisa, ema isibindi (Impela kugcine uNkulunkulu).
Nginesiqiniseko sokuthi owasabalalisa i-video ubengakulindele lokho. Mhlawumbe ubelindele ukukhokhelwa noma azibulale umfundisi. Mhlawumbe ubelindele ukuba umfundisi angaphinde akhulume ngezindaba zikaNkulunkulu, kodwa ushwebile.
Funda nalolu daba: Usekhulumile uPastor Zondo.
Engikwaziyo ukuthi lifezekile icebo likaNkulunkulu; ‘amanyala’ kaZondo ahlale obala. Kodwa akuphelanga ngoZondo ngoba uNkulunkulu ubefuna ayeke ‘ukungcola’ abekwenza agxile emsebenzini wakhe wokondla abantu bakhe ngeZwi.
Isibindi sokungazibulali, sokungakhokhi imali ekubeni usatshiswa ngokuthi izosatshalaliswa i-video, sikhomba ukuthi uNkulunkulu ubehamba nayo le ndoda.
Engingakusho nje ukuthi uNkulunkulu ukuphile isibindi Zondo, kusukela lapha ungabe usabuyela emuva.
Unkulunkulu izinto ezinjena akazenzi kunoma ubani kodwa uzenza kubantu abathembile, kubantu afuna bashiye izinto eziseceleni babheke yena kuphela.
Kubantu abasakhuluma namanje , begxeka, ngithi bazosala bebambe i-video kodwa obekuhloswe uNkulunkulu ngayo kwabaphutha.
Asidlule manje- kwi-video kodwa sibheke okuze ngemuva kwayo.