Publications
Partners
Durban - USekela Ngqongqoshe weMfundo ePhakeme, uMduduzi Manana, usesulile esikhundleni sakhe.
Lokhu kuqinisekiswe ngesitatimende esikhishwe ngoMgqibelo ekuseni bemubonga ngamagalelo akhe esikhundleni sakhe.
UManana usula esikhundleni sakhe kulandela isigameko sokushaya owesimame endaweni yokuqeda isizungu eCubana eFourways.
Ngemuva kwalesi sigameko, uManana wakhepha isitatimende exolisa ngalokhu okwenzeka.
OLUNYE UDABA:Livulelwe icala lokushaya owesifazane iPhini likaNgqongqoshe
“Ngifisa ukuxolisa ngokungenambandela ku-Ms Mandisa Duma, umndeni wakhe, uhulumeni waseNingizimu Afrika kanye nabantu bonke baseNingizimu Afrika, kanye nabesifazane ikakhulukazi, ngesigameko esenzeke eCubana restaurant eFourways ngempelasonto.
“Phezu kokuhlokolozwa okukhulu, bekufanele ngizibambe. Lesi sigameko esiyihlazo akumele siphinde senzeke. Ngiyazi ukuthi isenzo sami kanye nesabantu abebenami siphoxile futhi sahlukumeza abantu abaningi ezweni. Njengomholi bekufanele ngazi kangcono futhi ngenze kangcono.
“Ngiphinda ngiyazibophezela ngokuthi, uma ngabe isikhathi sesifanele, ngizophinde ngixhumane no-Ms Duma kanye nomndeni wakhe ukuze ngixolise, ngibhekane nokwenzekile futhi ngibhekane nokuhlukumezeka okwenzekile.
Izinhlangano ezimele amalungelo abantu zikwamukele ukusula kwakhe esikhundleni kodwa zivumelana ngokuthi umthetho kumele uthathe indawo yawo.
Abesimame abahlaselwa nguManana babe nengxoxo nabe-eNCA lapho baveze khona ukuthi basakhungathekile ngalokhu okwenzeka futhi yize exolisile, lokho akwanele.
"Ukuxolisa kukodwa akwanele, kumele aboshwe abhekane nengalo yomthetho ngalokhu akwenzile," kusho uDuma owahlaselwa wuManana.
