Cape Town – Umholi we-EFF uJulius Malema neSekela lakhe uFloyd Shivhambu baphinde baxoshwa ePhalamende ngemuva kokusola iSekela likaMengameli uCyril Ramaphosa ngokuba "negazi ezandleni zakhe".
Ngokubika kwezindaba ze-eNCA laba baholi baleli qembu baxoshwe nguSomlomo wePhalamende uBaleka Mbete ngoLwesithathu ntambama.
Kubikwa ukuthi laba baholi banqabile ukuhoxisa amazwi athi u‘Ramaphosa unegazi ezandleni zakhe’ nokuholele ekutheni uMbete angananazi abaxoshe kule ndlu yombuso.
OLUNYE UDABA: UMbete usephinde waxwayisa i-EFF
Umbiko uphinde uveza futhi ukuthi ngesikhathi uShivhambu esephuma uvezele uRamaphosa umunwe ophakathi nendawo kubuka amanye amalungu ePhalamende.
Kuthiwa uRamaphosa ubephendula imibuzo ePhalamende ngokwesikhundla sakhe njengomholi wezamabhizinisi kahulumeni.
Kuvela ukuthi uchaze isigameko saseMarikana njengesidabukisa kakhulu futhi angafisi siphinde senzeke.
Kuzokhumbuleka ukuthi sekuyinsakavukela umchilo wesidwaba ukuthi kuphazamiseke ukusebenza ePhalamende njengoba sekuke kwaxoshwa wonke amalungu e-EFF phambilini ngesikhathi uMengameli Jacob Zuma ezophendula imibuzo, kanti izolo iqembu eliphikisayo namanye adubile aphume ngesikhathi kudingidwa elokugudluzwa kukaMbete esikhundleni sikaSomlomo.
- “Like” ikhasi lethu kuFacebook ukuze uthole izindaba ngolimi lwakho