Johannesburg – UMengameli Jacob Zuma ngoLwesithathu uthe sekumele iphele indaba yeNkandla ngoba nokungenadosi sekuyatinyela, wagxeka amaqembu aphikisayo ngokusebenzisa iPhalamende njengenkulisa.
“Ngeke nize niqede unyaka wonke nikhuluma ngendlu yendoda eyodwa. Indlu nje kuphela,” esho, ephakamisa umunwe wokukhomba ngesikhathi ephendula inkulumo yesabelomali.
“Izinsolo azisho ukuthi sekuyisinqumo leso, Intando yeningi ithatha isikhathi,” esho, ebhekise odabeni lokuqiniswa kwezokuphepha emzini wakhe oseNkandla.
OLUNYE UDABA:UZuma uxolise ngodlame olubhekiswe kwabokufika eMoz
Kuthiwa kulo mklamo kwasetshenziswa u-R246 million.
Uphinde wagxeka ukuziphatha kwakamuva kwamalungu ePhalamende.
“Asizange silwele inkululeko ukuba abantu baziphathe ngale ndlela. Kumele siziphathe ngendlela eyamukelekile. IPhalamende akuyona inkulisa, lapha sidingida izinto eziphathelene nezwe.”
Uthe kumele kusolwe amaqembu aphikisayo “ngendlala” yezepolitiki ngoba yiwo abuza imibuzo engenamsoco.