Polokwane - Umholi we-Economic Freedom Fighters uJulius Malema usetshele izinkumbi zabalandeli bakhe abebehlangene ePolokwane, wathi uzimisele ukumelana necala abekwe lona lenkohlakalo nokukhwabanisa.
"Ngicele ukuhlukaniswa nabanye ababekwe amacala, ngicele ukushushiswa ngingedwa. Uma abanye bengazimisele, mina ngimi ngomumo," kusho uMalema.
Icala likaMalema nozakwabo lihlehliselwe umhlaka-3 Agasti, 2015.
Funda nalolu daba: Inhlokomo kutheleka uMalema
Laba babekwe amacala angu-52 ahlanganisa nowokusabalalisa imali ngokungekho emthethweni. Ngenyanga kaMashi, inkantolo yachitha amacala ayebekwe usomabhizinisi uSelbie Manthatha, unkosikazi wakhe uHelen Moreroa kanye nomfowabo uMakgetsi Manthatha.
Laba kuthiwa abalandelanga imigudu efanele ngesikhathi befaka isicelo sethenda ka-R52 million, yoMnyango wezokuThutha eLimpopo.
UMbuso uthi uMalema wahlomula kakhulu kulethenda, wakwazi ukuthenga ipulazi nemoto yohlobo lweMercedes-Benz.
Ngemuva kokungena kwecala, uMalema uphume wakhuluma nabalandeli bakhe ababambe umlindelo ngoMsombuluko ebusuku.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.