Bathi uthathwe ngokhokho bakhe owele emgodini

Johannesburg - Owesilisa waseMissionvale ePort Elizabeth oshone ngemuva kokuwela emseleni ombiwe ngabasebenza emgwaqeni kuthiwa ubulawe ngokhokho bakhe.

Akukacaci noma ubulewe wabe esefakwa kulo msele obugcwele amanzi nodaka noma ushibulikile wawela phakathi, kodwa abomndeni wakhe bayaphikelela ekutheni ushone ngenxa yokuziba ubizo lwakhe lokuba yisangoma.

Ubulawe ngokhokho ngoba enqabile ukuyothwasa, basho kanje ngesikhathi bebukele uSiphiwo Nelani, 44, elele phansi ngoMsombuluko ekuseni.

OLUNYE UDABA: Sisola isandla semfene isangoma esidle imbumba emahhashini

U-Anti kamufi utshele abeDaily Sun ukuthi: "Ugogo wakhe wayeyisangoma kanti naye ubenobizo lokuba yisangoma."

Oyinduna eCivil 2000 construction, uLunga Mgoqo, uthe: "Siqale ngokumpompa amanzi emvula emseleni ekuseni ngezithuba zabo-07:30, ngezithuba zabo-08:45 kwakhona esikubonayo odakeni. Sivele sashaqeka sesibona ukuthi yisidumbu sendoda."

UMgoqo uphinde wathi babize amaphoyisa nezakhamuzi okuyizo ezimhlonzile.

Ngemuva kokukhishwa kwesidumbu sakhe amafu ahlakazekile.

Ezinye zezakhamuzi ziyakuphikisa okokuthi ubulawe ngokhokho bakhe, kubika iDaily Sun.

"Yingoba akukhanyi emgwaqeni," kusho isakhamuzi esineminyaka engu-23 ubudala.

 - “Like” ikhasi lethu kuFacebook ukuze uthole izindaba ngolimi lwakho                                

 - Landela IzindabaNews24 kuTwitter

 - Thola ezinye izindaba zeDaily Sun kumakhalekhukhwini wakho

 - Thola izindaba zeDaily Sun kuFacebook