I-ANC ithi siyathembisa isimo sikaMthembu e-ICU

Johannesburg – Okhulumela inhlangano ebusayo i-African National Congress uZizi Kodwa uthe ilungu layo lePhalamende uJackson Mthembu usesimeni esigculisayo nakuba esegunjini labagula kakhulu esibhedlela eMalahleni Private. 

“Usemoyeni okahle futhi uyakhuluma kodwa odokotela basafuna ukumxilonga,” kusho uKodwa.

UMthembu wadutshulwa ngeSonto ebanjwa inkunzi ngesikhathi ekhipha imali kwi-ATM.

 “Usengaphakathi egunjini labagula kakhulu kodwa akuyona into etheni,” kuveza uKodwa.

OLUNYE UDABA: I-ANC iqinisekise ukudutshulwa kukaMthembu

Kuthiwa uMthembu wabe ekhipha imali emgwaqweni uMandela eWitbank ngesikhathi ehlaselwa ngowesilisa owayehlome ngesibhamu owamphoqa ukuthi akhiphe yonke imali yakhe.

Kubikwa ukuthi uMthembu wagoloza kwabe sekusuka udweshu nokuyilapho adubuleka khona.

Okhulumela amaphoyisa aseMpumalanga uBrigadier Selvy Mohlala uthe uMtehembu wadubuleka esihlathini. 

Uthe ngemuva kokudubuleka kukaMthembu owesilisa owayephethe isibhamu nabanye abathathu ayehamba nabo baqonda emotweni baphuca abangani imali nomakhalekhukhwini ngaphambi kokuthi bacele empunzini.

UMohlala uthe amaphoyisa asevule icala lokubabamba inkunzi.  

     - “Like” ikhasi lethu kuFacebook ukuze uthole izindaba ngolimi lwakho

        - Landela IzindabaNews24 kuTwitter