I-DA ithi akuhlolwe abazomakela u-matric

Mhleli

I-DA ifuna bonke abamaka amaphepha ebanga leshumi bavivinywe ezifundweni abasuke bezozimaka, lokhu kulandela ukuthi kuvele ukuthi othisha abafundisa izibalo abangu 253 esifundazweni bethole amamaki angama 57 wamaphesenti ngokwe average ngenkathi bephenduliswa amaphepha eminyaka edlule ebanga leshumi esifundo sezibalo (maths).  

Lolu cwaningo olubhalwe izifundiswa zase-UKZN nase-DUT, lwashicilelwa ku Perspectives in Education Journal ngo Mashi, lwenziwa ukuze kuhlolwe ulwazi lothisha ngesifundo sezibalo abazifundisayo.  Ngaphandle nje kokuthi bathole u-57 wamaphesenti i-average, uhhafu walabothisha abahloliwe uthole ngaphansi kwamaphesenti angu 61, kwathi ikota yathola ngaphansi kwamaphesenti angu 39.

Izinga lokuphasa isifundo sezibalo ebangeni leshumi ngonyaka owedlule libengu 53,6 wamaphesenti.  Umbuzo ukuthi – abafundi bangafinyelela kanjani ezingeni eliphezulu uma othisha babo bengenawo amakhono adingekayo ukufundisa lesisifundo?  Lento isewuchungechunge lwalelihlazo elikhonjiswa nangokubeka imaki lokuphasa libengu 30 wamaphesenti.

Lesi simo esiphambi kwethu singumphumela wokushoda kobuholi emnyangweni wezemfundo esifundazweni.  Uma umnyango wezemfundo esifundazweni unethemba lokufeza umsebenzi wawo ngokwe-PGDP kumele othisha baqeqeshwe ngendlela banikezwe amathuluzi abawadingayo. 

I DA entshonalanga Koloni eminyakeni edlule yaqala uhlelo lokuvivinya labo abasuke bezomakela abafundi bebanga leshumi ulwazi lwabo ngezifundo abasuke bezozimaka.  Uhlelo oluhle kakhulu lolu olukhuculula labo abasuke bengekho ezingeni futhi luqinisekisa ukuthi abafundi bangabekeki esimweni esingesihle.  Kodwa-ke umnyango wezemfundo e-KZN usalokhu uqhubeka nokuthobela ingcindezi yezinyunyana njengoba unqaba ukuqalisa loluhlelo. 

Uhlelo lwentuthuko lukazwelonke (NDP) lubeka imfundo phezulu eqhulwini.  Kodwa ngaphandle kothisha abanamakhono okufundisa, into nje engathi shu.

I-DA ilindele ukuba ungqongqoshe wezemfundo esifundazweni uPeggy Nkonyeni amemezele ukuvivinywa kothisha abamaka amaphepha ebanga leshumi.  Futhi sifuna ukubona uhlelo lokuthuthukisa amakhono othisha nokubuyisela ukuhlonishwa komsebenzi wobuthishela.  Ikusasa lezigidi zabantu abasha lisengcupheni. 

Disclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Lokho kuchaza ukuthi imibono yababhali bezingosi eshicilelwe kuNews24, akuyona imibono yeNews24.

 – "Like" ikhasi lethu ku-Facebook uze ukwazi ukujoyina inkulumo ngolimi lwakho.

 – Landela IzindabaNews24 kuTwitter (@IzindabaNews24).