"I-EFF izoya enkantolo iyofaka isicelo esiphuthumayo sokuvimbela iPhalamende mayelana nesinqumo esilithathile esingekho emthethweni,” kusho okhulumela i-EFF uMbuyiseni Ndlozi.
"IPhalamende belingakazikhiphi izincwadi ezigunyaza ukumiswa kwamalungu e-EFF, ngakho silinde zona ukuze sizokwazi ukuyovula icala."
NgoLwesine, isiShayamthetho sinqume ukumisa amalungu angu-12 e-EFF.
OLUNYE UDABA: Akakhokhe imali uZuma - EFF
Lo mbiko uncome ukuthi umholi we-EFF uJulius Malema, uSotswebhu uFloyd Shivambu, uGodrich Gardee, Mpho Ramakatsa, Khanyisile Litchfield-Tshabalala noMbuyiseni Ndlozi bamiswe izinsuku ezingu-30 bengaholi.
Amanye amalungu e-EFF, o-Elsabe Louw, Ngwanamakwetle Mashabela, Nthako Matiase, Hlengiwe Maxon, Magdalene Moonsamy no-Andile Mngxitama, azomiswa izinsuku ezingu-14.
Amanye amalungu angu-8 ayalelwe ukuba axolise ngomlomo.
Lokhu kumayelana nesidumo esasuka ePhalamende ngesikhathi amalungu aleli qembu ememeza ethi uMengameli Jacob Zuma kumele akhokhe imali.
- “Like” ikhasi lethu kuFacebook ukuze uthole izindaba ngolimi lwakho