Ngokombiko leli qembu liveze lokhu esitatimendeni elisikhiphe ngoMsombuluko.
“Sikholelwa ekutheni ukuvalwa kwalamakolishi kunomthelela kwinkinga yothisha esibhekene nayo,” kusho ilungu le-IFP esiShayamthetho saKwaZulu Natal uThembeni kaMadlopha-Mthethwa kwisitatimende.
“La makolishi akhiwa ngesikhathi kusabusa i-IFP KwaZulu Natal kanti uhulumeni okhona manje akalibonanga ikusasa kuwona njengoba wawavala.”
Umbiko uveza ukuthi lowo owayenguNgqongqoshe wezeMfundo eNingizimu Afrika uKader Asmal waba yingxenye yokuvalwa kwala makolishi.
OLUNYE UDABA: Bathuka izanya abe-IFP e-KZN
Kuvela ukuthi ngo-2008 uJacob Zuma waveza ukuthi ukuvalwa kwala makolishi akubanga yisinqumo esiphusile ngesikhathi evakashele eRichards Bay.
“U-Asmal uyindoda ekholelwa ekutheni wazi yonke into.
Lesi sinqumo saba simbi okudlula uhlelo lobandlululo kwezemfundo,” kusho uZuma ngesikhathi esanguMengameli we-ANC.
Kubikwa ukuthi u-Asmal wasula ePhalamende ngonyaka ofanayo ngemuva kokuba enqabe ukuvotela ukuthi kuhlakazwe oFezela.
U-Asmal wadlula emhlabeni ngo-2011.
UKaMadlopha uthe kumele la makolishi asheshe avulwe ukunqanda izinkinga ezibhekene nothisha.
“Ukushoda kothisha kuseyinkinga futhi kusazoqhubeka uma ingalungiswa indaba yala makolishi ikakhulukazi ezindaweni zasemakhaya,” esho.
- “Like” ikhasi lethu kuFacebook ukuze uthole izindaba ngolimi lwakho