Johannesburg – Kushone abantu abahlanu kwathi abangu-29 balimala kanzima ezingozini ezintathu emgwaqweni eyahlukene KwaZulu Natal ngokusho kwabezimo eziphuthumayo.
Lezi zingozi ngokwehlukana kwazo zenzeke ngoLwesihlanu ebusuku nasezintatha zangoMgqibelo.
Abantu abathathu bashone ngesikhathi iloli lishayisana nemoto encane emgwaqweni onguthelawayeka u-N3 ngaseHammarsdale, kusho okhulumela abezimo eziphuthumayo uRobert Mckenzie.
Kule ngozi kulimale umuntu oyedwa.
Abanye ababili balimale emgwaqweni u-N2 ngaseHarding ngesikhathi ibhasi elincane lishayisana netekisi.
OLUNYE UDABA: Kudutshulwe kwabulawa amabhungu eKapa
Kule ngozi kuphinde kwalimala abantu abangu-18 okuhlanganisa nengane eneminyaka emihlanu ubudala okuphoqeleke ukuthi iphuthunyiswe esibhedlela ngendiza enophephela emhlane ngoLwesihlanu ebusuku, kuchaza uMckenzie.
“Kulimale umshayeli webhasi kwathi abanye abebegibelile kulona baphuma bengenamyocu.”
Abantu abayishumi balimale ezintatha zangoMgqibelo ngesikhathi iveni abebehamba ngalo liphuma emgwaqweni liyowela onqanqameni lomgwaqo u-N2 phakathi kwaseStanger naseDarnell.
Abalimalile balashelwe endaweni yesigameko ngaphambi kokuba baphuthunyiswe ezibhedlela ezahlukene, kuphetha uMckenzie.
- “Like” ikhasi lethu kuFacebook ukuze uthole izindaba ngolimi lwakho