Lezi zelamani ezinhlanu, ezihlala ndawonye eChesterville ngaseThekwini, zinokwesabela ukuthi lo muntu owenza lokhu uwasebenzisela umuthi amaphenti azo.
Isehlakalo sokugcina senzeke ngoLwesihlanu ngesikhathi omncane kulezi zelamani, uFuthi, elahlekelwa yithawula lakhe lokugeza kanye namaphenti.
“Siyashintshana ngokugada izimpahla esizinekile. Indlu yangasese yokugeza incane futhi siyishumi esihlala lapha, ngakho amaphenti ethu siwaneka phandle.
“NgoLwesihlanu ngiye kogeza ngezithuba zabo-05:00 ngase ngineka iphenti kanye nethawula kulayini. Ngemuva kwemizuzu engu-20 bese kungasabonwa," kusho uFuthi.
“Kungokokuqala lokhu kwenzeka kumina kodwa sekuvamile kodadewthu njengoba kwaqala kusukela ngoNovemba ukuthathwa kwamaphenti abo. Ngiyesaba ngoba omunye udadewethu, uBathobile, walahlekelwa yiphenti lakhe ngonyaka odlule ngemuva kwalokho waphuphunyelwa yisisu.
“Ngesikhathi eya esangomeni, samtshela ukuthi kunomuntu osebenzise iphenti lakhe emuthini.
UBathobile utshele iDaily Sun ukuthi: “Ngesikhathi iphenti lami libuya kwakunomugqa omnyama kodwa lalihlanzekile.”
Ukuqinisekisile ukuthi ngemuva kokuphuphunyelwa yisisu watshelwa yisangoma ukuphuphuma kwesisu kuhlobene nokunyamalala kwezingubo zakhe zangaphansi.
USihlalo weTraditional Healers Association uSazi Mhlongo uthe abantu bakholelwa wukuthi amaphenti ayinsila yomuntu ngakho angasetshenziselwa ukuthakatha.
- “Like” ikhasi lethu kuFacebook ukuze uthole izindaba ngolimi lwakho