Izinduna zisabise ngokuphazamisa ukhetho

Durban – Izinduna  KwaZulu Natal zisabise ngokuphazamisa ukhetho lohulumeni basekhaya uma uhulumeni ehluleka ukufeza isethembisa sokubakhokhela zinyanga zonke ngokusho kombiko.

USihlalo wezinduna kulesi sifundazwe uVusimuzi Mthethwa ngoMsombuluko uthe sebelinde kwaze kwanela manje.  

“Sabatshela emhlanganweni esaba nawo ngoLwesine olwedlule ukuthi uma bengasikhokheli kulokhu, sizoba nemashi futhi sizoluphazamisa ukhetho lwangonyaka ozayo.

Sizoqinisekisa ukuthi bonke abahlala ezindaweni ezingaphansi kwezinduna KwaZulu Natal abalubhadi ukuyovota futhi bakhumbule ukuthi baningi abantu abahlala kulezi zindawo kulesi sifundazwe,” kusho uMthethwa.

OLUNYE UDABA:Kutholwe izidumbu ezishile ngasesiteshini sesitimela

“Isethembiso sokusikhokhela basenza kudalala kodwa kuze kube yimanje abakaze.

Kungani bajaha ukukhipha izitatimende kwabezindaba ekubeni bazi ukuthi babekhulumela into ezokwenzeka ngemuva kweminyaka eyishumi?,” kubuza uMthethwa.

Ngokusho kombiko, uMengameli Jacob Zuma uqoke ukwenza imali ezokhokhelwa izinduba ibe ngu-R84 125 ngonyaka njengoba lokhu kwaphakanyiswa yikhomishana ebhekelela inani okumele ihlonyulwe yilabo abasebenzela umphakathi (Commission for Remuneration of Public Office Beareres).

Zibalelwa ku-2 039 izinduna KwaZulu Natal kanti umnyango udinga isamba semali elinganiselwa ku-R171 million ngonyaka ukuze ukwazi ukuholela.

NgoLwesine uNdunankulu wakulesi sifundazwe uhlangane nezinduna ukuzodingida lolu daba lwale mihlomulo.

Okhulumela undunankulu uthe useke wawezwa amahlebezi ngokuthi izinduna zihlela ukumashela eMgundlovu ngenxa yokungagculiseki.

Uthe Mchunu uhlanganile nezinduna ngoLwesine wazichazela iqiniso mayelana nodaba oluthinta imali okumele itholwe yizinduna.

      - “Like” ikhasi lethu kuFacebook ukuze uthole izindaba ngolimi lwakho

         - Landela IzindabaNews24 kuTwitter