Kuboshwe ababambe inkunzi ngesibhamu sethoyizi e-EC

Cape Town – Kuboshwe abalisa ababili ngemuva kokuba bebambe inkunzi umdayisi onetafula emgwaqweni eButterworth ngemuva kokuba bemkhombe ngesibhamu sethoyizi, ngokusho kwamaphoyisa.

Lo mlisa obethenge izimpahla zokugqoka abezozidayisa uhlaselwe ngamadoda amabili ngoLwesibili ngemuva kokwehla ebhasini, kusho okhulumela amaphoyisa uCaptain Jackson Manatha.

Uqhube wathi laba basolwa bamkhombe ngesibhamu sethoyizi bamphuca lezi zimpahla zenani elinganisela ku-R4 000 ngaphambi kokuthi bacele empunzini ngezinyawo.

OLUNYE UDABA: Abhekane necala lokuthumba amaphoyisa aseMthatha

Ngemuva kokubanjwa inkunzi lo mlisa ubone amaphoyisa abezihambela wawamisa wawatshela ngosekumehlele.

“Ngokuhamba kwesikhathi amaphoyisa akwazile ukubamba laba basolwa abaneminyaka engu-21 no-22 ubudala babe sebekhalelwa ngamasongo kaSigonyela.

"Kungenzeka ukuthi laba basolwa bayathinteka kobunye ubugebengu endaweni yaseButterworth namaphethelo,” kusho uManatha.

Kulindeleke ukuthi laba basolwa bavele enkantolo ngoLwesine.

      - “Like” ikhasi lethu kuFacebook ukuze uthole izindaba ngolimi lwakho

        - Landela IzindabaNews24 kuTwitter