Kuboshwe abatholwe nenyufomu yamaphoyisa eGoli

Johannesburg – Kuboshwe abasolwa ababili ngokuduna imoto nokutholakala nenyufumo yamaphoyisa, ilambu elibuhlaza, izibhamu ezingekho emthethweni nezinhlamvu ngokusho kwamaphoyisa akwaMetro eGoli. 

Ngokubika kwe-eNCA okhulumela iJohannesburg Metro Police Department uWyne Minnaar uthe ukubohswa kwalaba basolwa kwenzeke ngoLwesihlanu emini emgwaqweni uLennin e-Alexandra.

“Bajikile babaleka ngesikhathi bebona kunesivimbamgwaqo,” echaza.

Ngesikhathi amaphoyisa akwa-JMPD ebamisa athole ukuthi le moto abebehamba ngayo ibiyebiwe futhi inezinombolo ezahlukene ezingahambisani.

OLUNYE UDABA: Iqale ngezidumbu impelasonto yobumnandi eKZN

“Ngaphakathi emotweni bekunezibhamu ezimbili, inyufomu yamaphoyisa nelambu elihlaza,” kusho uMinnaar.

Uqhube ngokuthi amaphoyisa asola ngokuthi laba basolwa bayathinteka futhi eqenjini lezigilamkhuba elaziwa ngeRolex elidume ngokubamba inkunzi ezindaweni zabadla izambane likapondo.

Uthe uphenyo luyaqhubeka kanti abasolwa bazovela maduze eNkantolo yeMantshi yaseWynberg.

       - “Like” ikhasi lethu kuFacebook ukuze uthole izindaba ngolimi lwakho

        - Landela IzindabaNews24 kuTwitter