Kuboshwe indoda etholakale nemoto eyebiwe

Johannesburg – Owesilisa ukhalelwe ngamasongo kaSigonyela ngemuva kokutholakala nemoto eyebiwe eJabulani eSoweto ngokusho kwamaphoyisa aseGauteng.

UWarrant Officer Kay Makhubela uthe amaphoyisa abezihambela ahlangabezane nesexwayiso setacker esibika imoto eyebiwe ngeSonto ebusuku.

Uthe amaphoyisa ayithungathile le moto kanti kuthe ngesikhathi ezama ukuyimisa yashaya yachitha ngesivinini.

“Amaphoyisa abe eseyijaha kwathi umshayeli wayo wahluleka ukuyilawula yashayisa uthango lwesikole,” echaza.

OLUNYE UDABA:Akaphilile ontshontshe imoto ebithwele isidumbu

“Umsolwa oneminyaka 32 ubudala uficwe ngamaphoyisa esavaleleke ngaphakathi emotweni wabe eseboshwa kanjalo ke,” kusho uMakhubela enanela ngokuthi lo msolwa uzovela eNkantolo yeMantshi yaseProtea maduze. 

Uthe le moto kwabikwa ukuthi yebiwe ekuqaleni kwale nyanga esiteshini samaphoyisa eLinden eRandburg. 

Kubikwa ukuthi lo msolwa ube ngoka-193 ukuboshwa kule mpelasonto eSoweto.

Kuvela ukuthi abanye abasolwa baboshelwe amacala shlukene okuhlanganisa awokuhlukumeza ngokocansi, ukushayela bedle amanzi amponjwana namanye athinta izidakamizwa.

      - “Like” ikhasi lethu kuFacebook ukuze uthole izindaba ngolimi lwakho

          - Landela IzindabaNews24 kuTwitter