Johannesburg - Abasebenzi ababili bakamasipala eChatsworth bakhalelwe ngamasongo kaSigonyela ngezinsolo zokuthi bafune ukufumbathiswa, kusho amaphoyisa aKwaZulu-Natal.
Laba bobabili zibakhalele ngoLwesithathu, ngemuva kokulunywa indlebe yikhasimende elinqanyulelwe ugesi ngoba likweleta u-R35 000, kusho okhulumela amaphoyisa uColonel Jay Naicker.
"La basebenzi kuthiwa batshele ikhasimende ukuthi kumele libafumbathise u-R3 000 ukuze balixhumele ugesi bese besula isikweletu."
Ikhasimende libe selibika ngalolu daba esiteshini samaphoyisa esiseMontclair, kwase kwaziswa amaphoyisa asebenza ngobugebengu obuhleliwe eThekwini.
Abasebenzi laba babe sebeholelwa ophathe ngokuthi ikhasimende likhokhe le mali okukhulunywe ngayo.
Abasolwa, abaneminyaka engu-37 no-48 ubudala, babe sebeyaboshwa.
- “Like” ikhasi lethu kuFacebook ukuze uthole izindaba ngolimi lwakho